दुबई / रियाद ।  संयुक्त अरब इमिरेट्सको दुबईबाट इजरायलको तेलअभिभतर्फ उडेको फ्लाईडूबाइ  को एक व्यावसायिक विमान आपत्कालीन सङ्केत जारी गर्दै साउदी अरेबियामा आपत्कालीन अवतरण गरेको छ।

सार्वजनिक गरिएको फ्लाइट ट्र्याकिङ सूचनाअनुसार, उडान भरेलगत्तै उक्त विमानले आपत्कालीन सङ्केत प्रसारण गरेको थियो। विमानले ‘अवैध हस्तक्षेप’  को सङ्केत दिएको बताइएको छ। यद्यपि, एयरलाइन्सले विमानले मार्गमा रहँदा एक ‘घटना’  को सामना गरेको पुष्टि गर्दै साउदी अरेबियाको ताबुक विमानस्थलमा विमान सकुशल अवतरण भएको र सबै यात्रुहरू सुरक्षित रहेको जानकारी दिएको छ। यस विषयमा थप विवरणहरू पछि साझा गरिने एयरलाइन्सले जनाएको छ।

इजरायली सञ्चार माध्यमहरूले अधिकारीहरूलाई उद्धृत गर्दै जनाए अनुसार, विमानमा आपत्कालीन सङ्केत जारी हुनुको कारण चालक दल (पाइलटहरू) बीचको आपसी विवाद रहेको बुझिएको छ। यस घटनालगत्तै इजरायली सेनाका चिफ अफ द जनरल स्टाफ इयाल जामीरले वरिष्ठ अधिकारीहरूसँग आपत्कालीन सुरक्षा स्थितिबारे समीक्षा बैठकसमेत गर्नुभएको छ। हाल यस घटनाबारे थप अनुसन्धान जारी छ।