काठमाडौँ, २६ असोज । सत्तारूढ नेपाल कम्युनिस्ट पार्टी (एमाले) ले आगामी मङ्सिर २ र ३ गते काठमाडौँमा राष्ट्रिय कार्यकर्ता भेला आयोजना गर्ने भएको छ। 

एमाले सचिव तथा सङ्गठन विभाग प्रमुख भानुभक्त ढकालले सोमबार पत्रकारहरूसँग कुरा गर्दै राष्ट्रिय कार्यकर्ता भेलाको मिति र तयारीबारे जानकारी दिनुभएको हो।

 केन्द्रीय कमिटीको निर्णय कार्यान्वयन

यसअघि गत असोज ५ देखि ९ गतेसम्म काठमाडौँमा सम्पन्न एमाले केन्द्रीय कमिटी बैठकले मङ्सिर पहिलो साता राष्ट्रिय कार्यकर्ता भेला गर्ने निर्णय गरेको थियो। सोही निर्णयअनुसार मङ्सिर २ र ३ गते दुई दिन भेला आयोजना गर्ने तय भएको सचिव ढकालले बताउनुभयो।

भेलामा को-को हुनेछन् सहभागी?

एमालेले राष्ट्रिय कार्यकर्ता भेलाका लागि सहभागीहरूको मापदण्ड र कार्यसूचीसमेत तय गरिसकेको छ। भेलामा पार्टीका केन्द्रीय, प्रदेश र स्थानीय तहका मुख्य नेतृत्वको उपस्थिति रहनेछ:

• स्थानीय तह: पालिका कमिटीका अध्यक्षहरू, स्थानीय तहका प्रमुख तथा उपप्रमुखहरू

• जिल्ला तथा प्रदेश: जिल्ला कमिटीका पदाधिकारीहरू र प्रदेश कमिटीका सदस्यहरू

• केन्द्रीय स्तर: केन्द्रीय कमिटीका सम्पूर्ण सदस्यहरू र सङ्घीय तथा प्रदेश सभाका सांसदहरू

पार्टीको सङ्गठनात्मक सुदृढीकरण, पछिल्लो राजनीतिक परिस्थिति र भावी कार्यदिशाबारे छलफल गर्न एमालेले यो राष्ट्रिय भेला बोलाएको हो।