रुपन्देही, २ कात्तिक । आगामी आईसीसी महिला यू–१९ विश्वकप र एसिया कपको तयारीका लागि भैरहवामा सञ्चालन गरिएको नेपाली महिला यू–१९ राष्ट्रिय क्रिकेट टोलीको दोस्रो चरणको बन्द प्रशिक्षण आइतबार सम्पन्न भएको छ।

भैरहवास्थित सिद्धार्थ क्रिकेट रङ्गशालामा गत असोज २० गतेदेखि सुरु भएको १३ दिने प्रशिक्षणमा सातै प्रदेशबाट छनोट भएका २८ जना महिला खेलाडी सहभागी थिए।

पूर्वराष्ट्रिय खेलाडी तथा यू–१९ टोलीका प्रशिक्षक महेश रिजालले खेलाडीलाई प्रशिक्षण दिएका थिए। उनी आईसीसी महिला यू–१९ क्रिकेटसँग सम्बन्धित प्रशिक्षकका रूपमा समेत आबद्ध छन्।

सन् २०२७ को जनवरी–फेब्रुअरीमा नेपाल र बङ्गलादेशमा संयुक्त रूपमा आयोजना हुने आईसीसी महिला यू–१९ विश्वकपलाई लक्षित गरी खेलाडीको क्षमता अभिवृद्धि र प्रतियोगिताको तयारीका लागि बन्द प्रशिक्षण सञ्चालन गरिएको रुपन्देही क्रिकेट सङ्घका पूर्वअध्यक्ष प्रशान्त मल्लले जानकारी दिए।

बन्द प्रशिक्षणले खेलाडीलाई आगामी अन्तर्राष्ट्रिय प्रतियोगिताका लागि आवश्यक तयारी गर्न सहयोग पुग्ने अपेक्षा गरिएको छ।