बेइजिङ । उत्तर कोरियाली नेता किम जोङ उन चीनको सीमावर्ती सहर डान्दोङको एकदिने भ्रमण सकेर स्वदेश फर्किएका छन्। चीन र उत्तर कोरियालाई जोड्ने नयाँ यालु नदी पुल औपचारिक रूपमा सञ्चालनमा आएको करिब एक सातापछि किमले उक्त पुल पार गर्दै चीन भ्रमण गरेका हुन्।

चिनियाँ सरकारी समाचार संस्था सिन्ह्वाका अनुसार शनिबार भएको भ्रमणका क्रममा किमले चीनका वरिष्ठ नेता वाङ हुनिङसँग भेटवार्ता गरेका थिए। चीनका राष्ट्रपति सी चिनफिङको सन्देश लिएर पुगेका वाङले किमलाई सीका तर्फबाट हार्दिक अभिवादन तथा शुभकामना व्यक्त गरेका थिए।

किमको भ्रमण निर्माण सम्पन्न भएको १२ वर्षपछि हालै सञ्चालनमा आएको नयाँ यालु नदी पुलसँग जोडिएको छ। सन् २०१४ मा निर्माण पूरा भए पनि उत्तर कोरियातर्फ आवश्यक सडक तथा भन्सार पूर्वाधार तयार नहुँदा उक्त पुल सञ्चालनमा आउन सकेको थिएन। यसको सञ्चालनलाई दुई देशबीच व्यापारिक सम्पर्क विस्तार गर्ने महत्त्वपूर्ण कदमका रूपमा हेरिएको छ।

भ्रमणका क्रममा किम र वाङले कोरियाली युद्ध स्मारकको अवलोकन गरेका थिए। सिन्ह्वाका अनुसार किमले सन् १९५०–१९५३ को कोरियाली युद्धमा उत्तर कोरियाको पक्षमा लडेका चिनियाँ सैनिकप्रति श्रद्धाञ्जली अर्पण गरेका थिए। उनीहरूले स्थानीय मोटरगाडी कारखानाको समेत भ्रमण गरेका थिए।

उक्त अवसरमा किमले चीनसँगको ऐतिहासिक मित्रतालाई निरन्तरता दिँदै व्यावहारिक सहकार्य विस्तार गर्न उत्तर कोरिया तयार रहेको बताएका थिए। भ्रमणको अन्त्यमा वाङले किमलाई नयाँ पुलसम्म पुगेर बिदाइ गरेका थिए।

विश्लेषकहरूका अनुसार यो भ्रमणले चीनसँगको सम्बन्धलाई सुदृढ बनाउने उत्तर कोरियाको प्रयासलाई प्रतिबिम्बित गर्छ। पछिल्ला वर्षमा रुससँग पनि सम्बन्ध विस्तार गरिरहेको प्योङयाङले अमेरिका नेतृत्वको शक्तिसँगको प्रतिस्पर्धाका सन्दर्भमा बेइजिङ र मस्कोसँग सहकार्य बढाउन खोजिरहेको उनीहरूको विश्लेषण छ।

चीन–उत्तर कोरिया व्यापार विस्तारको अपेक्षा

यालु नदीमाथि निर्माण गरिएको नयाँ पुल करिब तीन किलोमिटर लामो छ। चार लेनको यस पुलबाट चौबिसै घण्टा दुवैतर्फ सवारीसाधन सञ्चालन गर्न सकिने व्यवस्था गरिएको छ। पुलबाट कन्टेनर तथा भारी मालवाहक ट्रकसमेत आवतजावत गर्न सक्ने अपेक्षा गरिएको छ।

पुल सञ्चालनमा आएपछि चीन र उत्तर कोरियाबीच सामान ढुवानीमा रहेको प्रमुख अवरोध हट्ने र द्विपक्षीय व्यापार विस्तार हुने अपेक्षा गरिएको छ।

चीनको लियाओनिङ एकेडेमी अफ सोसल साइन्सेसका चीन–उत्तर कोरिया सम्बन्धविज्ञ लु चाओले पुल सञ्चालनले दुई देशबीचको व्यापारिक ढुवानी सहज बनाउने बताएका छन्। रोयटर्ससँग कुरा गर्दै उनले ढुवानीसम्बन्धी अवरोध कम भएपछि द्विपक्षीय व्यापार थप बढ्न सक्ने बताएका थिए।

चीन उत्तर कोरियाको सबैभन्दा ठूलो व्यापारिक साझेदार हुनुका साथै आर्थिक, राजनीतिक तथा कूटनीतिक सहयोगको प्रमुख स्रोत हो। कोरियाली युद्धका बेला उत्तर कोरियाको पक्षमा लडेको चीनले त्यसयता प्योङयाङलाई निरन्तर सहयोग गर्दै आएको छ।

यद्यपि, पछिल्ला वर्षमा उत्तर कोरिया र रुसबीचको सम्बन्ध पनि थप निकट बनेको छ। सन् २०२२ मा रुसले युक्रेनमाथि पूर्णस्तरको आक्रमण सुरु गरेपछि दुई देशबीचको सहकार्य विस्तार भएको हो। विश्लेषकहरूका अनुसार रुससँगको बढ्दो निकटताले उत्तर कोरियाको चीनमाथिको निर्भरता केही घटाएको छ।

चीनसँगको सम्बन्धलाई रणनीतिक प्राथमिकता

किमको यसअघिको पछिल्लो ज्ञात चीन भ्रमण सन् २०२५ को सेप्टेम्बरमा भएको थियो। त्यसबेला उनी दोस्रो विश्वयुद्धमा जापानमाथि विजयको ८०औँ वार्षिकोत्सवका अवसरमा बेइजिङमा आयोजित कार्यक्रममा सहभागी भएका थिए। सोही क्रममा उनले चिनियाँ राष्ट्रपति सीसँग भेटवार्ता गरेका थिए।

त्यसपछि सन् २०२६ को जुनमा राष्ट्रपति सीले उत्तर कोरियाको राजकीय भ्रमण गरेका थिए। उक्त भ्रमणका क्रममा सीले व्यापार, कृषि, निर्माण र प्रविधिलगायतका क्षेत्रमा द्विपक्षीय सहकार्य विस्तार गर्न चीन इच्छुक रहेको बताएका थिए। किमले पनि चीनसँगको सम्बन्धलाई आफ्नो देशको प्रमुख रणनीतिक प्राथमिकतामध्ये एकका रूपमा प्रस्तुत गरेका थिए।

नयाँ पुल सञ्चालन र किमको पछिल्लो भ्रमणलाई चीन तथा उत्तर कोरियाबीच आर्थिक सम्पर्क विस्तारसँगै राजनीतिक सम्बन्धलाई थप सुदृढ बनाउने प्रयासका रूपमा हेरिएको छ।