काठमाडौं । अमेरिकी यूट्युबरबाट बक्सर बनेका ज्याक पल एन्थोनी जोसुआसँगको पराजयपछि करिब एक वर्षमा फेरि रिङमा उत्रने भएका छन्। उनी क्रिसमस ईभ अर्थात् डिसेम्बर २४ मा दुबईमा हुने बक्सिङ कार्डका मुख्य आकर्षण बन्नेछन्।

२९ वर्षीय पलले आफ्नो प्रतिद्वन्द्वीको नाम भने अहिलेसम्म सार्वजनिक गरेका छैनन्।

गत वर्ष डिसेम्बर १९ मा अमेरिकाको मियामीमा भएको हेभीवेट खेलमा पूर्वविश्व च्याम्पियन जोसुआसँग पल छैटौँ राउन्डमै नकआउट भएका थिए। उक्त पराजयका क्रममा उनको बङ्गारा दुई ठाउँमा भाँचिएको थियो। उपचारका लागि उनले डिसेम्बर र फेब्रुअरीमा गरी धेरै पटक शल्यक्रिया गराउनुपरेको थियो। दुबईको खेल उनको त्यसपछिको पहिलो खेल हुनेछ।

आफ्नो फिर्तीबारे जारी वक्तव्यमा पलले भने, “मैले वर्षौंसम्म आलोचकलाई गलत प्रमाणित गर्दै, जोखिम मोल्दै र कसैले कल्पनासमेत नगरेका प्रतिद्वन्द्वीसँग भिड्दै आफूलाई सिद्ध गर्दै आएको छु। जे भए पनि मेरो आत्मविश्वास र लक्ष्यमा कुनै परिवर्तन आएको छैन। म पहिलेभन्दा बढी भोकाएको छु, र डिसेम्बर २४ मा दुबईमा रिङमा फर्किएर आफ्नो यात्राको नयाँ अध्याय सुरु गर्नेछु।”

उनले थपे, “हाम्रो सूचीमा धेरै नाम छन्, हेरौँ कसले सम्झौतामा हस्ताक्षर गर्छ।”

पलको व्यावसायिक रेकर्ड १२ जित र २ हारको छ। उनले हालसम्म बेलायतका टमी फ्युरी र जोसुआसँग मात्र पराजय बेहोरेका छन्।

उनले पूर्वहेभीवेट च्याम्पियन माइक टायसनसँग प्रदर्शनी खेल पनि खेलेका थिए, जसमा सर्वसम्मत अंक निर्णयबाट विजयी भएका थिए। तर त्यो खेल देखावटी भएको भन्दै व्यापक आलोचना भएको थियो।