धितोपत्र बजारमा नेप्सेको उत्साहजनक वृद्धि, साताभर सकारात्मक कारोबार

काठमाडौँ, १२ मङ्सिर । धितोपत्र बजारमा यस साता शेयर कारोबार मापक नेप्से परिसूचक लगातार पाँचै दिन बढेर उकालो लागेको छ। आइतबारदेखि बिहीबारसम्मको समग्र बजार सूचक चार प्रतिशतभन्दा बढीले वृद्धि भई २,६७६.०३ विन्दुमा पुगेको छ।

नेपाल स्टक एक्सचेञ्ज (नेप्से) का अनुसार, साताभरि कुल ६ करोड २९ लाख ९९ हजार ६०४ कित्ता शेयर रु ३२ अर्ब १७ करोड १३ लाख ३६ हजार १८९ बराबरमा कारोबार भएको छ। मङ्गलबारबाहेक सबै दिन कारोबार रकम रु ६ अर्बभन्दा बढी रह्यो भने मङ्गलबारको कारोबार रु ५ अर्बमा सीमित रह्यो।

आइतबार: नेप्से ३९.९२ अंकले बढेर २,६००.२२ विन्दुमा पुग्यो। सागर डिस्टिलरी, बन्दीपुर केबलकार र झापा इनर्जीको शेयरमा सकारात्मक सर्किट लाग्यो।

सोमबार: नेप्से ५०.४४ अंकले उकालो लागेर २,६५०.६६ विन्दुमा पुग्यो। नेपाल लाइफ इन्स्योरेन्स शीर्ष कारोबारमा रह्यो भने झापा इनर्जी, सागर डिस्टिलरी, बन्दीपुर केबलकार, स्वस्तिक लघुवित्त र श्रीनगर एग्रोटेक इन्डस्ट्री लिमिटेडका लगानीकर्ताले ९ प्रतिशतभन्दा बढी कमाए।

मङ्गलबार: नेप्से ५.३२ अंकले बढेर २,६५५.९९ विन्दुमा पुग्यो। होटल तथा पर्यटन समूह सबैभन्दा धेरै १.४१ प्रतिशतले उकालो लाग्यो। बन्दीपुर केबलकार शीर्ष कारोबारमा रह्यो।

बुधबार: नेप्से ९.६१ अंकले बढेर २,६६५.६० विन्दुमा पुग्यो। एनआरएन इन्फ्रास्ट्रक्चर रु ६२ करोड ४३ लाखभन्दा बढीको कारोबारसहित शीर्ष स्थानमा रह्यो। झापा इनर्जी, सागर डिस्टिलरी, स्वस्तिक लघुवित्त, श्रीनगर एग्रोटेक, रिभरफल्स पावर र माहुली लघुवित्तका लगानीकर्ताले ९ प्रतिशतभन्दा बढी कमाए।

बिहीबार: नेप्से १०.४३ अंकले बढेर २,६७८.०३ विन्दुमा पुग्यो। सागर डिस्टिलरीको शेयर १० प्रतिशतले बढेर सकारात्मक सर्किट लाग्यो। बैंकिङ्ग समूहको उपसूचक सर्वाधिक १.४९ प्रतिशतले बढ्यो।

बजार निरन्तर उकालो लागिरहेको अवस्थामा निकट भविष्यमा आउने मौद्रिक नीतिको समीक्षाले नेप्सेको गतिमा प्रभाव पार्ने देखिन्छ। हाल ब्याजदर न्यून र तरलता पर्याप्त भए पनि कर्जा विस्तार अपेक्षित रूपमा बढ्न सकेको छैन।

यस्तोमा लगानीकर्ताको मनोबल बढाउन नियामक स्पष्टता, कर्जा विस्तारमा प्रोत्साहन र पुँजीबजारमैत्री प्रावधान आवश्यक रहेको विश्लेषकहरूको भनाइ छ। आगामी निर्वाचनको स्थिर र सकारात्मक वातावरणले पनि बजारमा मनोवैज्ञानिक ऊर्जा थप्ने जानकारहरू बताउँछन्।