तीजको अवसरमा पशुपति मन्दिर वरपर मासु र मदिरा निषेध

काठमाडौं, ३१ भदौ । तीजको अवसरमा जिल्ला प्रशासन कार्यालय काठमाडौंले पशुपति मन्दिर वरपर मासु र मदिरा निषेध गरेको छ ।

असोज १ गते परेकाे तीजको अवसरमा पशुपति क्षेत्रभित्र पवित्रता कायम गर्ने चार किल्ला तोकेर मासु, मदिरा र अन्य नशालु पदार्थ निषेध गरेको हो ।

जिल्ला प्रशासन कार्यालय काठमाडौंले जारी गरेकाे सूचनामा उल्लेख भए अनुसार पूर्वमा गौशाला मित्रपार्क सडकदेखि पूर्व, पश्चिममा पशुपति क्षेत्रको पूर्व सिमानादेखि पश्चिम, उत्तरमा गौशाला तीलगंगा चक्रपथदेखि उत्तर र दक्षिणमा मित्रपार्क, उमाकुण्ड गौरीघाट हुँदै बागमतीदेखि दक्षिणसम्म चार किल्ला तोकेको छ ।

जिल्ला प्रशासन कार्यालय काठमाडौंले भदौ ३१ गतेदेखि नै यो क्षेत्रमा मासु, मदिरा तथा नशालु पदार्थहरु उत्पादन, बेचबिखन, ओसारपसार, भण्डारण र सेवन गर्न निषेध गरिएको जनाएको छ ।