सहिदहरूको बलिदानको कदर गर्न पूर्वराष्ट्रपति भण्डारीको आह्वान

काठमाडौँ, १६ माघ । पूर्वराष्ट्रपति विद्यादेवी भण्डारीले सहिद दिवसको अवसरमा शहीदहरूको योगदानको स्मरण गर्दै महत्वपूर्ण सन्देश दिनुभएको छ।

उहाँले एक्स (पूर्व ट्विटर) मा लेख्नुभएको सन्देशमा विशेषगरी निरंकुश राणा शासनको विरुद्ध लड्ने क्रममा सहादत प्राप्त गर्नुभएका चार महान् सहिदहरू – शुक्रराज शास्त्री, दशरथ चन्द, गंगालाल श्रेष्ठ र धर्मभक्त माथेमाको विशेष स्मरण गर्नुभएको छ।

भण्डारीले यी शहीदहरूको साथै अन्य ज्ञात-अज्ञात सहिदहरूको योगदान अमर रहने बताउनुभएको छ। उहाँको सन्देशमा एउटा गहिरो आशय समेटिएको छ – शहीदहरूको बलिदानको सम्मान गर्दै राष्ट्र निर्माणको कार्यमा जुट्नुपर्ने आवश्यकता । उहाँले सबै राजनीतिक दलका नेतृत्व र नागरिक समाजलाई शहीदहरूको सपना साकार पार्न एकजुट हुन आह्वान गर्नुभएको छ।