काठमाडौं, २७ जेठ । बेलायतमा सुन्दर भविष्यको सपना देख्दा ३८ जना युवाले ११ करोडभन्दा बढी रकम गुमाउनु परेको छ।

उनीहरूलाई रोजगारीका लागि युके पठाउने झूटो आश्वासन दिएर ठगी गर्ने दुई जनालाई प्रहरीले पक्राउ गरेपछि यो तथ्य बाहिर आएको हो।

काठमाडौं उपत्यका अपराध अनुसन्धान कार्यालयले मोरङका लक्ष्मण पराजुली र धनुषाका अरूणराज शर्मालाई पक्राउ गरेको छ। प्रहरीका अनुसार, उनीहरूले विभिन्न व्यक्तिबाट ११ करोड ६ लाख ९७ हजार रुपैयाँ संकलन गरी सम्पर्कविहीन भएका थिए।

पीडितहरूको उजुरीपछि वैदेशिक रोजगार विभागको आग्रहमा प्रहरीले उनीहरूलाई पक्राउ गरी विभागमा बुझाएको छ। यो घटनाले वैदेशिक रोजगारीको नाममा हुने ठगीको भयावह अवस्थालाई फेरि एकपटक उजागर गरेको छ।