गठबन्धन सरकारले देशमा विकासको लहर ल्याएको छ : प्रधानमन्त्री ओली
जलेश्वर, ९ साउन । प्रधानमन्त्री केपी शर्मा ओलीले वर्तमान संयुक्त सरकारले देशमा विकास र सुशासनको लहर ल्याएको दाबी गर्नुभएको छ।
महोत्तरीको मटिहानीमा आयोजित एक कार्यक्रमलाई सम्बोधन गर्दै उहाँले नेपाली कांग्रेस र नेकपा (एमाले) जस्ता प्रमुख दल सम्मिलित सरकार जनताका पक्षमा अहोरात्र खटिएको बताउनुभयो।
उहाँले एमाले, कांग्रेस, लोसपासहितको गठबन्धनले स्पष्ट नीति र कार्यक्रमका साथ तराई–मधेसदेखि हिमालसम्म समान विकास निर्माणलाई प्राथमिकता दिएको बताउनुभयो। राजनीतिक स्थिरताका लागि बनेको यो सरकार आगामी निर्वाचनसम्म निरन्तर चल्ने र यसको विकल्प नभएको उहाँले स्पष्ट पार्नुभयो।
मटिहानीस्थित विग्ही नदीमा बनेको पुलको उद्घाटन गर्दै प्रधानमन्त्री ओलीले यसले स्थानीयलाई जनकपुरसँग जोड्ने मात्र नभई व्यापार, शिक्षा र स्वास्थ्य क्षेत्रमा समेत ठूलो फाइदा पुर्याउने विश्वास व्यक्त गर्नुभयो।
त्यस्तै, नवनिर्मित प्रसूति गृहले अब यस क्षेत्रका कुनै पनि गर्भवती वा नवजात शिशुले उपचार अभावमा ज्यान गुमाउनु नपर्ने अवस्था सिर्जना गरेको उहाँले बताउनुभयो।
कार्यक्रममा लोसपा अध्यक्ष महन्थ ठाकुर, श्रममन्त्री शरत्सिंह भण्डारी, भौतिक पूर्वाधारमन्त्री देवेन्द्र दाहाल लगायतले मधेसको खडेरी र पानीको समस्याको दिगो समाधानका लागि सबै पक्षको संयुक्त प्रयास आवश्यक रहेकोमा जोड दिनुभयो।
