हलेसीबाट फर्कँदै गरेकाे माइक्रोबस खोटाङमा दुर्घटना: एकको मृत्यु, १४ घाइते

खोटाङ, १९ साउन। खोटाङको प्रसिद्ध हलेसी मन्दिरको दर्शन गरी सिरहा फर्कँदै गरेको तीर्थयात्री सवार एक माइक्रोबस आज बिहान दुर्घटना हुँदा एक जनाको मृत्यु भएको छ। दुर्घटनामा अन्य १४ जना घाइते भएका छन्।

मध्यपहाडी लोकमार्गको जयराम-हलेसी सडकखण्ड अन्तर्गत कदुवास्थित डौँठेखोला नजिकै प्रदेश २-०-१-००१ ज ००५३ नम्बरको माइक्रोबस सडकबाट करिब २०० मिटर तल खसेको हो। बिहान करिब ९ बजे भएको उक्त दुर्घटनामा चालकसहित १६ जना सवार थिए।

जिल्ला प्रहरी कार्यालय, खोटाङका अनुसार, दुर्घटनालगत्तै स्थानीय र प्रहरीको सहयोगमा घाइतेहरूको उद्धार गरिएको थियो। घाइतेहरूलाई तत्कालै उपचारका लागि नजिकैको घुर्मीस्थित जनसेवा पोलिक्लिनिक लगिएको थियो।

तीमध्ये ६ जनाको अवस्था गम्भीर रहेकाले थप उपचारका लागि काठमाडौँको राष्ट्रिय ट्रमा सेन्टरमा पठाइएको छ भने अन्य ८ जनाको अवस्था सामान्य रहेको छ।

दुर्घटनामा परेकाहरू साउन महिनामा लाग्ने ‘बोलबम’ मेला भर्न हलेसी पुगेका दर्शनार्थी थिए। प्रहरीले दुर्घटनाको कारणबारे अनुसन्धान भइरहेको जनाएको छ।