एजेन्सी, ११ कात्तिक । इजरायलको आमनिर्वाचनमा प्रधानमन्त्री बेन्जामिन नेतान्याहुको गठबन्धन कमजोर देखिएको छ । एक्जिट पोलले उहाँका प्रतिद्वन्द्वीलाई तुलनात्मक रूपमा बलियो देखाए पनि कुनै पनि पक्षले स्पष्ट बहुमत हासिल गर्ने सङ्केत नदेखिएकाले नयाँ सरकार गठनमा अन्योल बढेको छ ।

नेतान्याहुको लिकुड पार्टीले सबैभन्दा बढी मत प्राप्त गरेको देखिए पनि उहाँको धार्मिक तथा राष्ट्रवादी गठबन्धनले संसद्मा ५० देखि ५१ सिट मात्र जित्ने अनुमान गरिएको छ । पूर्वसेना प्रमुख गदी आइसेनकोट नेतृत्वको विपक्षी समूहले भने ५१ देखि ५२ सिट प्राप्त गर्न सक्ने एक्जिट पोलको आकलन छ ।

इजरायली संसद्मा बहुमतका लागि १२० मध्ये कम्तीमा ६१ सिट आवश्यक पर्छ । अरब नेतृत्वका दलहरूले १९ सिट प्राप्त गर्न सक्ने अनुमान गरिएकाले सरकार गठनमा उनीहरूको भूमिका निर्णायक बन्न सक्ने देखिएको छ ।

निर्वाचन समितिका अनुसार लिकुडले २३.३६ प्रतिशत र आइसेनकोटको याशर पार्टीले १५.७४ प्रतिशत मत प्राप्त गरेका छन् । अन्तिम आधिकारिक परिणाम यसै साताको अन्त्यसम्म सार्वजनिक हुने अपेक्षा गरिएको छ ।

नेतान्याहुले अरब दलहरूको समर्थनमा सरकार नबनाउने अडान दोहोर्‍याउनुभएको छ । तर, आइसेनकोटले निश्चित सर्तमा सहकार्य गर्न सकिने सङ्केत दिनुभएको छ । दुवै पक्षबीच सहमति हुन नसके लामो राजनीतिक वार्ता वा पुनः निर्वाचनको अवस्था आउन सक्ने सम्भावना छ ।

निर्वाचन अभियानमा प्यालेस्टिनी राज्यको विषयले भने कम प्राथमिकता पाएको थियो । प्रमुख उम्मेदवारहरूले अवरुद्ध शान्ति प्रक्रिया अघि बढाउने ठोस प्रस्ताव प्रस्तुत गरेनन् । सन् २०२१ मा इजरायली सरकारको गठबन्धनमा सहभागी हुने पहिलो अरब नेतृत्वको दल रामका नेता मन्सुर अब्बासले अरब समुदायमा बढ्दो अपराध र सुरक्षालाई चुनावी मुद्दा बनाउनुभएको थियो ।

सन् २०२३ अक्टोबर ७ मा हमासले गरेको आक्रमणमा एक हजार २०० जनाको मृत्यु हुनु र २५१ जना बन्धक बनाइनुले पनि निर्वाचनलाई प्रभावित गरेको छ । नेतान्याहुका आलोचकहरूले उक्त सुरक्षा विफलताको जिम्मेवारी लिनुपर्ने र स्वतन्त्र छानबिन आयोग गठन गर्नुपर्ने माग गर्दै आएका छन् । उहाँका समर्थकहरूले भने गाजा, लेबनान र इरानसँगका युद्धमा हासिल उपलब्धिको प्रशंसा गरेका छन् ।

अति परम्परावादी यहुदी पुरुषलाई सैनिक सेवाबाट दिइँदै आएको छुट पनि चुनावको प्रमुख मुद्दा बनेको छ । तीन वर्षदेखि जारी युद्धका कारण यस्तो छुटप्रति असन्तुष्टि बढेको छ । गाजाको युद्धमा छोरा र दुई भतिजा गुमाउनुभएका आइसेनकोटले सैनिक सेवासम्बन्धी छुट अन्त्य गर्ने प्रतिबद्धता जनाउनुभएको छ । एक्जिट पोलले अति परम्परावादी यहुदी दलहरूको समर्थन घटेको देखाएको छ ।