बबई नदीले खतराको तह पार गर्यो, बर्दिया र दाङमा बाढीको उच्च जोखिम
काठमाडौँ, साउन २० । बबई नदीको जलसतहले खतराको तह पार गरेको छ, जसका कारण बर्दिया र दाङ जिल्लामा बाढीको उच्च जोखिम बढेको छ।
जल तथा मौसम विज्ञान विभागका अनुसार, बबई नदीमा पानीको सतह ७.१ मिटर पुगेको छ, जबकि ६.८ मिटरलाई खतराको तह मानिन्छ।
विभागले चेतावनीको तह (५.५ मिटर) र खतराको तह (६.८ मिटर) दुवै पार भइसकेकाले तटीय क्षेत्रका बासिन्दालाई तत्काल उच्च सतर्कता अपनाउन आग्रह गरेको छ।
विभागका बाढीविद् विनोद पराजुलीले बबई नदीको तटीय क्षेत्रमा बसोबास गर्ने सर्वसाधारण, स्थानीय तह र जिल्ला प्रशासन कार्यालयलाई पूर्वसूचना प्रणालीमार्फत सचेत गराइसकिएको जानकारी दिनुभयो। उहाँले भन्नुभयो, “बबईसँगै महाकाली नदीको जलसतह पनि खतराको तह नजिक पुगेको छ, त्यसैले पश्चिमी क्षेत्रमा थप सतर्क रहनुपर्ने देखिन्छ।”
आज काभ्रेपलाञ्चोक, मकवानपुर, दाङ, बाँके, चितवन, कैलाली, कञ्चनपुरलगायतका जिल्लाहरूमा बहने साना नदीहरूमा समेत आकस्मिक बाढी आउन सक्ने उच्च जोखिम रहेको विभागले जनाएको छ। बिहानको मापनमा कर्णाली र महाकाली सतर्कता तह नजिक रहे पनि अन्य प्रमुख नदीहरू सामान्य अवस्थामै छन्।
विभागले देशका करिब ३५ जिल्लाका साना नदीहरूमा बहाव बढ्ने र आकस्मिक बाढी आउन सक्ने पूर्वानुमान गर्दै सबैलाई सुरक्षित रहन अपिल गरेको छ।
