ह्यारी र मेगनको नेटफ्लिक्ससँग नयाँ बहु-वर्षीय सम्झौता, सम्बन्ध तोडिने हल्लाको अन्त्य

काठमाडौं  । ड्यूक र डचेस अफ ससेक्स, राजकुमार ह्यारी र मेगनले स्ट्रिमिङ जायन्ट नेटफ्लिक्ससँग आफ्नो चलचित्र र टिभी कार्यक्रमसम्बन्धी सम्झौता विस्तार गरेका छन्। यो घोषणासँगै ससेक्स दम्पती र नेटफ्लिक्सबीचको सहकार्य टुंगिने हल्लाहरूमा पूर्णविराम लागेको छ।

यो नयाँ सम्झौतालाई “बहु-वर्षीय, फर्स्ट-लुक सम्झौता” भनिएको छ। यसअनुसार, राजकुमार ह्यारी र मेगनको प्रोडक्सन कम्पनी ‘आर्चेवेल’ले कुनै नयाँ प्रोजेक्ट बनाउँदा त्यसको पहिलो प्रस्ताव नेटफ्लिक्सलाई दिनुपर्नेछ। यो पहिलेको सम्झौताभन्दा केही खुकुलो भए पनि यसले दुई पक्षबीचको व्यावसायिक सम्बन्ध जारी रहने कुरालाई पुष्टि गरेको छ।

डचेस मेगनले भनिन्, “नेटफ्लिक्ससँगको साझेदारीले हामीलाई विश्वभरका दर्शकलाई छुने र हाम्रो साझा दृष्टिकोणलाई उत्सव मनाउने खालका विचारशील सामग्री सिर्जना गर्न प्रेरित गरेको छ।”

यो सम्झौता कति वर्षको हो र यसको आर्थिक पाटो के-कस्तो छ भन्नेबारे खुलाइएको छैन। सन् २०२० मा भएको अघिल्लो सम्झौता करिब १०० मिलियन अमेरिकी डलर (करिब ७५ मिलियन पाउन्ड) को भएको विश्वास गरिन्छ।

यो घोषणा मेगनको कुकरी शो ‘विथ लभ, मेगन’ को दोस्रो सिजन यसै महिना रिलिज हुनुअघि आएको हो। नेटफ्लिक्सको तथ्यांकअनुसार, २०२५ को पहिलो ६ महिनामा यस शोको पहिलो सिजन स्ट्रिमिङ सेवाको सबैभन्दा लोकप्रिय ३०० कार्यक्रमको सूचीमा समेत पर्न सकेको थिएन। ‘विथ लभ, मेगन’ लाई ५.३ मिलियन (५३ लाख) पटक हेरिएको थियो, जबकि सोही अवधिमा नेटफ्लिक्सको सबैभन्दा लोकप्रिय कार्यक्रम ‘एडोलेसेन्स’ लाई १४५ मिलियन (१४.५ करोड) पटक हेरिएको थियो।

यसअघि, सन् २०२२ मा आएको ह्यारी र मेगनको व्यक्तिगत वृत्तचित्र ‘ह्यारी एन्ड मेगन’ ले भने ठूलो दर्शक पाएको थियो। शाही जीवनबाट बाहिरिएको कथा समेटिएको उक्त वृत्तचित्रलाई २३.४ मिलियन (२ करोड ३४ लाख) पटक हेरिएको थियो।

आर्चेवेल प्रोडक्सनले ‘विथ लभ, मेगन’ को विशेष क्रिसमस संस्करण पनि घोषणा गरेको छ, जसमा दर्शकहरूलाई “मोन्टेसिटोमा मेगनसँग एक जादुमयी बिदा मनाउन” आमन्त्रित गरिएको छ। यसै शोसँग सम्बन्धित ‘एज एभर’ नामक खाद्यान्न र पेय पदार्थको ब्रान्ड पनि बजारमा ल्याइएको छ, जसमा रोज वाइन र जामहरू समावेश छन्।

यस वर्षको अन्त्यमा ह्यारी र मेगन निर्माता रहेको ‘मासाका किड्स, अ रिदम विदिन’ नामक अर्को शो पनि नेटफ्लिक्समा आउँदैछ। उक्त शो युगान्डाको एक अनाथालयमा आधारित छ, जसले एचआईभी/एड्स संकटको छायामा पनि आशाको किरण छरिरहेको कथा बताउँछ।

नेटफ्लिक्सकी प्रमुख सामग्री अधिकृत बेला बजारियाले भनिन्, “ह्यारी र मेगन प्रभावशाली आवाज हुन् जसका कथाहरूले विश्वभरका दर्शकहरूलाई छुन्छन्। उनीहरूको कामप्रतिको प्रतिक्रिया आफैँमा प्रमाण हो – ‘ह्यारी एन्ड मेगन’ ले दर्शकहरूलाई उनीहरूको जीवनको अन्तरंग झलक दियो र छिट्टै हाम्रो सबैभन्दा धेरै हेरिने वृत्तचित्र शृङ्खलाहरू मध्ये एक बन्यो।”