दाउन्नेमा पाँच सवारीसाधन एकापसमा ठोक्किए: आठ जना घाइते, राजमार्ग अवरुद्ध

नवलपरासी, २७ फागुन । पूर्वपश्चिम राजमार्गअन्तर्गत नवलपरासी (बर्दघाट सुस्तापूर्व) को दाउन्नेमा गएराति पाँचवटा सवारीसाधन एकापसमा ठोक्किँदा आठ जना घाइते भएका छन् । विनयी त्रिवेणी गाउँपालिका–२ स्थित घिउखोला नजिकै भारतीय कन्टेनरले नियमविपरीत ‘ओभरटेक’ गर्दा यो दुर्घटना भएको हो ।

जिल्ला प्रहरी कार्यालयका प्रहरी उपरीक्षक (एसपी) युवराज खड्काका अनुसार सुनौलीबाट पूर्वतर्फ आइरहेको भारतीय नम्बरको कन्टेनरले एकतर्फी सडकमा अर्को सवारीलाई उछिन्न खोज्दा विपरीत दिशाबाट आइरहेका सवारीसाधनहरूसँग ठोकिन पुगेको थियो ।

दुर्घटनामा परी मोटरसाइकल चालक कालिकोट रास्कोट–६ का ३० वर्षीय अमर कार्की र पछाडि सवार २५ वर्षीय महेन्द्र महतारा घाइते हुनुभएको छ । यस्तै, दुर्घटनामा परेको यात्रुवाहक बसमा सवार अन्य छ जना पनि घाइते भएका छन् ।

घाइते हुनेहरूमा बस चालक शङ्कर विष्ट (रोल्पा), विनोदकुमार अछामी (रामेछाप), उदीराम विष्ट (रोल्पा), नाम्नुहाङ राई (धरान), दर्शन पोख्रेल (रोल्पा), चन्द्रसिंह थापा (सुनसरी) र ६० वर्षीय यज्ञप्रसाद भुसाल (प्युठान) रहनुभएको छ । घाइते सबैको डण्डास्थित मध्यविन्दु प्रादेशिक अस्पतालमा उपचार भइरहेको प्रहरीले जनाएको छ ।

चालक फरार, राजमार्ग खुलाउने प्रयास जारी
दुर्घटना गराउने भारतीय कन्टेनरका चालक भने घटनास्थलबाट फरार भएका छन् । प्रहरीले उनको खोजी कार्य तीव्र पारिएको जनाएको छ ।

दुर्घटनाका कारण पूर्वपश्चिम राजमार्ग केही समय पूर्ण रूपमा अवरुद्ध भएको थियो । सडकमा ठोकिएका सवारीसाधनहरू हटाएर अवरुद्ध राजमार्ग सुचारु गराउने प्रयास भइरहेको एसपी खड्काले जानकारी दिनुभयो । ओरालो र साँघुरो सडकमा तीव्र गतिका कारण हुने यस्ता दुर्घटनाले दाउन्ने खण्डमा पटक–पटक जोखिम निम्त्याउने गरेको छ ।