ईबोलाको प्रकोप बढ्दो: ६०० मा संक्रमणको आशंका, १३९ को मृत्यु भएको विश्व स्वास्थ्य संगठनको पुष्टि

जेनेभा, ७ जेठ । प्रजातान्त्रिक गणतन्त्र कङ्गो र युगान्डामा ईबोला भाइरसको प्रकोप तीव्र गतिमा फैलिरहेको छ। विश्व स्वास्थ्य संगठन (WHO) का अनुसार हालसम्म ६०० जनामा संक्रमणको आशंका गरिएको छ भने १३९ जनाको मृत्यु भइसकेको छ।

तथ्यांक अझै बढ्न सक्ने चेतावनी दिँदै डब्लुएचओले यसलाई ‘अन्तर्राष्ट्रिय चिन्ताको सार्वजनिक स्वास्थ्य आपतकाल’ घोषणा गरेको छ। यद्यपि, विशेषज्ञहरूले यसलाई तत्कालै ‘विश्वव्यापी महामारी’को संज्ञा भने दिएका छैनन्।

बुधबार जेनेभामा आयोजित पत्रकार सम्मेलनमा डब्लुएचओका महानिर्देशक टेड्रोस अधानोम गेब्रेयससले भने, “हाम्रो मूल्यांकन अनुसार यो प्रकोपको जोखिम राष्ट्रिय र क्षेत्रीय स्तरमा निकै उच्च छ, तर विश्वव्यापी स्तरमा भने अहिले जोखिम न्यून देखिएको छ।”

उपचार र खोप नभएको प्रजाति
स्वास्थ्य अधिकारीहरूका अनुसार यो पटकको प्रकोप ‘बुन्डिबुग्यो’ नामक ईबोलाको प्रजातिका कारण फैलिएको हो। चिन्ताको विषय यो छ कि यस प्रजातिका विरुद्ध हालसम्म कुनै पनि खोप वा निश्चित उपचार पद्धति विकास भएको छैन।

डब्लुएचओका आपतकालीन प्रमुख चिक्वे इहेक्वेजुले अहिलेको प्राथमिकता संक्रमणको साङ्लो  पहिचान गर्नु रहेको बताए। उनले भने, “संक्रमण कहाँ-कहाँ फैलिरहेको छ भन्ने स्पष्ट भएपछि मात्रै हामी बिरामीको हेरचाह र नियन्त्रणमा प्रभावकारी कदम चाल्न सक्छौँ।”

कसरी फैलियो संक्रमण?
प्रारम्भिक अनुसन्धानका अनुसार यो प्रकोप गत अप्रिल २० देखि सुरु भएको मानिएको छ। अधिकारीहरूका अनुसार कुनै अन्त्येष्टि संस्कार वा स्वास्थ्य केन्द्रमा भएको ‘सुपर-स्प्रेडर’ घटना (जहाँ एकै व्यक्तिबाट धेरैमा सर्छ) का कारण यो भयावह रूपमा फैलिएको हो।

कङ्गोको इतुरी र उत्तर किभु प्रान्तमा ५१ जनामा संक्रमणको पुष्टि भइसकेको छ। यता छिमेकी मुलुक युगान्डाको राजधानी कम्पालामा पनि दुई जनामा संक्रमण देखिएको छ, जसमा एक जनाको मृत्यु भइसकेको छ। कङ्गोमा उपचाररत एक विदेशी चिकित्सा स्वयंसेवकलाई थप उपचारका लागि जर्मनी लगिएको छ।

युरोपमा जोखिम कम
यसैबीच, युरोपेली संघले युरोपमा ईबोला फैलिने सम्भावना ‘निकै कम’ रहेको जनाएको छ। ईयूकी प्रवक्ता इभा हर्नसिरोभाले भनिन्, “रोगले सीमाना त चिन्दैन, तर युरोपेली नागरिकहरू अहिले नै त्रसित हुनुपर्ने अवस्था छैन। सामान्य स्वास्थ्य सल्लाह पालना गरे पुग्छ।”

कङ्गोले पाँच महिना अघि मात्रै अघिल्लो ईबोला प्रकोप अन्त्य भएको घोषणा गरेको थियो। तर छोटो समयमै फेरि नयाँ प्रजातिको संक्रमण देखिनुले अफ्रिकी क्षेत्रको जनस्वास्थ्यमा ठूलो चुनौती थपेको छ।(अन्तराष्ट्रिय न्यूज एजेन्सी)