एस्टन भिल्लाको ऐतिहासिक जित: बर्मिङ्घममा खुसीयाली छाउँदा घानाको एउटा गाउँमा पनि निस्कियो विजय जुलुस

काठमाडौं, ७ जेष्ठ । एस्टन भिल्लाले ३० वर्ष लामो ट्रफीको खडेरी अन्त्य गर्दै युरोपा लिगको उपाधि जितेपछि यसको उत्सव बेलायतको बर्मिङ्घममा मात्र नभई ५ हजार किलोमिटर टाढा अफ्रिकी देश घानाको एउटा सानो गाउँमा पनि भव्य रूपमा मनाइएको छ।

टर्कीको इस्तानबुलस्थित बेस्तिकास पार्कमा बुधबार भएको फाइनल खेलमा फ्राइबर्गलाई ३-० ले पराजित गर्दै भिल्लाले ऐतिहासिक सफलता हात पारेको हो। प्रशिक्षक उनाई एमरीको नेतृत्वमा रहेको टोलीले उपाधि जितेपछि बर्मिङ्घमका सडकमा ‘ओपन-टप’ बसमा विजय परेड गरिरहँदा, घानाको जुआबेन  गाउँमा पनि एउटा मिनीबस र ३० वटा मोटरसाइकलसहितको विशेष जुलुस निकालिएको छ।

हजुरबुबाको कथादेखि ‘फुटबलका भगवान’ सम्म
करिब १,००० भिल्ला समर्थकहरू रहेको यस गाउँमा ‘घाना लायन्स’ नामक समर्थक समूह सक्रिय छ, जसको नेतृत्व ओवुसु बोआकीले गरिरहेका छन्। जुआबेन गाउँमा एस्टन भिल्लाप्रतिको यो प्रेम दशकौँ पुरानो हो। ओवुसुका अनुसार उनका हजुरबुबा ड्यानियल कुनै समय बर्मिङ्घमको एउटा भिल्ला समर्थक परिवारसँग बसेका थिए।

“हामी सानो हुँदा हजुरबुबाले हामीलाई एस्टन भिल्लाको इतिहास र कथाहरू सुनाउनुहुन्थ्यो,” बोआकीले बीबीसीसँग भने, “उहाँले ‘भगवान’ उपनाम दिइएका एक खेलाडीको बारेमा धेरै कुरा गर्नुहुन्थ्यो।” ती ‘फुटबल भगवान’ अरू कोही नभएर क्लबका लेजेन्ड पल म्याकग्राथ थिए, जसले सन् १९८९ देखि १९९६ सम्म भिल्लाका लागि २५० भन्दा बढी खेल खेलेका थिए।

३० वर्षपछिको इतिहास
भिल्लाले यसअघि अन्तिम पटक सन् १९९६ मा लिग कप जितेको थियो। त्यसयता जुआबेनको नयाँ पुस्ता क्लबले नयाँ इतिहास रचेको हेर्न आतुर थियो। बुधबार युरी टिलेम्यान्स, एमिलियानो बुएन्डिया र मोर्गन रोजर्सले गोल गरेपछि उनीहरूको त्यो प्रतीक्षा समाप्त भएको हो।

“हिजो हाम्रो जीवनको सबैभन्दा राम्रो क्षण थियो,” खुसी हुँदै बोआकीले भने। “सन् १९८२ मा भिल्लाले युरोपियन कप जित्दा हामी जन्मेका पनि थिएनौं। हामी आफ्नै आँखाले इतिहास रचिएको हेर्न चाहन्थ्यौं। आज हामीले मिनीबस र ३० वटा मोटरसाइकल भाडामा लिएर पूरै समुदायमा नाराबाजी गर्दै जितको उत्सव मनाइरहेका छौं।”

बर्मिङ्घममा व्यावसायिक फुटबलको रौनक चलिरहँदा घानाको यो सानो गाउँमा देखिएको समर्थकहरूको निस्वार्थ प्रेमले फुटबलको वैश्विक प्रभावलाई पुनः पुष्टि गरेको छ।