अस्ट्रियाको विजयी सुरुआत, विश्वकप डेब्युटान्ट जोर्डन ३–१ ले पराजित
काठमाडौँ, ३ असार । फिफा विश्वकप २०२६ अन्तर्गत समूह ‘जे’ को खेलमा अस्ट्रियाले जोर्डनलाई ३–१ ले पराजित गर्दै २८ वर्षपछि विश्वकपमा गरेको पुनरागमनलाई विजयी बनाएको छ।
सान फ्रान्सिस्को बे एरिया स्टेडियममा सम्पन्न खेलमा अस्ट्रियाका लागि रोमानो स्मिड, जोर्डनका याजान अल अरबको आत्मघाती गोल तथा मार्को अर्नाउटोभिचले पेनाल्टीमार्फत गोल गरे। जोर्डनका लागि अली ओलवानले एक गोल फर्काए।
विश्वकपमा पहिलोपटक सहभागी भएको जोर्डनले खेलको सुरुआत आक्रामक ढंगले गरेको थियो। खेलको दोस्रो मिनेटमै कप्तान एहसान हद्दादले पहिलो अवसर सिर्जना गरे पनि उनको प्रहार साइड नेटमा पुगेको थियो। त्यसपछि १५औँ मिनेटमा ओदेह फाखौरीको टाढाबाट गरेको शक्तिशाली प्रहार अस्ट्रियाका गोलरक्षक अलेक्जेन्डर स्लागरले उत्कृष्ट बचाउ गर्दै बारमाथि पठाएका थिए।
खेलको २०औँ मिनेटमा भने अस्ट्रियाले अग्रता लियो। रोमानो स्मिडले पेनाल्टी क्षेत्रको किनाराबाट गरेको शानदार प्रहार सीधै जाली चुम्दा अस्ट्रिया १–० ले अघि बढ्यो।
दोस्रो हाफ सुरु भएको पाँच मिनेटमै जोर्डनले खेल बराबरीमा ल्यायो। नूर अल रवाब्देहको पासमा बल अघि बढाएका अली ओलवानले एकल प्रयासमा अस्ट्रियाको रक्षा पंक्ति छलेर उत्कृष्ट गोल गरे। उक्त गोलसँगै ओलवान विश्वकपमा गोल गर्ने पहिलो जोर्डनियन खेलाडी बने।
खेलको ६७औँ मिनेटमा मार्को अर्नाउटोभिचले गोल गर्दै अस्ट्रियालाई पुनः अग्रता दिलाएको जस्तो देखिए पनि भिडियो सहायक रेफ्री (VAR) को समीक्षा पछि स्टेफन पोशको ह्यान्डबल देखिएपछि उक्त गोल रद्द गरिएको थियो।
तर ७६औँ मिनेटमा अस्ट्रियाले पुनः अग्रता बनाउन सफल भयो। कर्नरबाट आएको बल क्लियर गर्ने क्रममा जोर्डनका डिफेन्डर याजान अल अरबले आफ्नै पोस्टमा हेडमार्फत गोल गरेपछि अस्ट्रिया २–१ ले अगाडि बढ्यो।
इन्जुरी समयको १२औँ मिनेटमा प्राप्त पेनाल्टीलाई अनुभवी फरवार्ड अर्नाउटोभिचले गोलमा परिणत गर्दै अस्ट्रियाको ३–१ को जित सुनिश्चित गरे।
यस जितसँगै अस्ट्रियाले विश्वकप २०२६ मा सुखद सुरुआत गरेको छ भने डेब्युटान्ट जोर्डनले हार बेहोरे पनि आफ्नो प्रदर्शनबाट सकारात्मक संकेत दिएको छ।
अब अस्ट्रियाले समूह चरणको अर्को खेलमा साविक विजेता अर्जेन्टिनाको सामना गर्नेछ। अर्जेन्टिनाले आफ्नो पहिलो खेलमा लियोनेल मेसीको ह्याट्रिक मद्दतमा अल्जेरियालाई ३–० ले पराजित गरेको थियो।
नकआउट चरणको सम्भावना कायम राख्न जोर्डनले अब अल्जेरियाविरुद्धको खेलमा सकारात्मक नतिजा निकाल्नुपर्नेछ।
