विश्वकप २०२६: पोर्चुगल र डिआर कङ्गो भिड्दै, रोनाल्डोको ऐतिहासिक छैटौँ विश्वकप यात्रा सुरु

ह्युस्टन, अमेरिका । फिफा विश्वकप २०२६ अन्तर्गत आज समूह ‘के’ को निकै प्रतिक्षित खेलमा पोर्चुगलले प्रजातान्त्रिक गणतन्त्र कङ्गो को सामना गर्दैछ। अमेरिकाको टेक्ससस्थित ह्युस्टन स्टेडियममा हुने यो खेल नेपाली समय अनुसार आज राति १०:४५ बजे  सुरु हुनेछ।

यो खेल फुटबल इतिहासकै एक महान् खेलाडी, ४१ वर्षीय क्रिस्टियानो रोनाल्डोका लागि विशेष रहनेछ। रोनाल्डो आज मैदान प्रवेश गरेसँगै कीर्तिमानी छैटौँ पटक विश्वकप खेल्ने खेलाडीको सूचीमा सामेल हुनेछन्।

रोनाल्डो: टोलीका लागि वरदान कि बोझ?
विश्वकपको पूर्वसन्ध्यामा पोर्चुगलका समर्थक र फुटबल विश्लेषकहरूबीच रोनाल्डोको भूमिकालाई लिएर बहस सुरु भएको छ। ४१ वर्षको उमेरमा उनी टोलीका लागि कत्तिको प्रभावकारी होलान् भन्ने चासोको विषय बनेको छ।

• हालको प्रदर्शन: सन् २०२२ को कतार विश्वकपमा केवल एक गोल गरेका रोनाल्डो, २०२४ को युरो कपमा पनि गोलरहित रहेका थिए। यो उनको करियरमा कुनै पनि ठूलो अन्तर्राष्ट्रिय प्रतियोगितामा पहिलो पटक गोल गर्न नसकेको क्षण थियो।

• पुनरागमनको संकेत: यद्यपि, २०२५ को युइएफए नेसन्स लिगमा उनले ८ गोल गर्दै पोर्चुगललाई उपाधि जिताउन मुख्य भूमिका खेले। स्पेन विरुद्धको फाइनलमा उनले गरेको बराबरी गोल र साउदी प्रो लिगमा अल-नासरका लागि गरेका २८ गोलले उनी अझै पनि ‘फिनिसर’ को रूपमा खतरनाक रहेको पुष्टि गर्छन्।

प्रशिक्षक मार्टिनेजको पूर्ण विश्वास
पोर्चुगलका प्रशिक्षक रोबर्टो मार्टिनेजले रोनाल्डोको बचाउ गर्दै उनलाई “फुटबलको सन्दर्भ र उदाहरण”  भनेका छन्। मार्टिनेजका अनुसार रोनाल्डोमा अझै पनि पहिलो विश्वकप खेल्न लागेको जस्तै जोस र तीव्रता छ।

“उनले गोल मात्र गर्दैनन्, विपक्षीको रक्षापंक्तिमा खाली ठाउँ  बनाएर अन्य खेलाडीलाई पनि अवसर दिन्छन्। हाम्रो टोलीको आक्रमणमा उनको उपस्थिति निकै महत्वपूर्ण छ,” मार्टिनेजले पत्रकार सम्मेलनमा भने।

डिआर कङ्गोको ऐतिहासिक पुनरागमन
५० वर्षपछि विश्वकपमा फर्किएको डिआर कङ्गोका लागि यो खेल ऐतिहासिक छ। सन् १९७४ मा ‘जायरे’ को नामबाट विश्वकप खेलेपछि कङ्गो पहिलो पटक विश्वमञ्चमा देखिन लागेको हो। विश्वकपमा अहिलेसम्म कुनै गोल र अंक जोड्न नसकेको कङ्गो यस पटक पोर्चुगल जस्तो बलियो टोलीलाई रोकेर इतिहास रच्ने दाउमा छ।

कङ्गोका प्रशिक्षक सेबास्टियन देसाब्रेले रोनाल्डोको सम्मान गर्दै भने, “म उनी (रोनाल्डो) ले गोल गरुन् भन्ने कामना गर्छु, तर हाम्रो टोली विरुद्ध होइन।”

कीर्तिमानको होड र अन्य स्टारहरू
यस पटकको विश्वकपमा रोनाल्डोका मुख्य प्रतिद्वन्द्वी लियोनेल मेस्सीले कीर्तिमानी ह्याट्रिक गर्दै जर्मनीका मिरोस्लाभ क्लोसको १६ गोलको रेकर्ड बराबरी गरिसकेका छन्। यस्तै, फ्रान्सका एमबाप्पे र नर्वेका हालाण्डले पनि दुई-दुई गोल गर्दै उत्कृष्ट सुरुवात गरेका छन्।

रोनाल्डोले आज गोल गरेमा उनी छ वटा फरक विश्वकप संस्करणमा गोल गर्ने विश्वकै पहिलो खेलाडी बन्नेछन्। ८ विश्वकप गोल गरिसकेका रोनाल्डोका लागि मेस्सी र क्लोसको रेकर्ड पछ्याउने यो अन्तिम मौका हुन सक्छ।

समूह ‘के’ को समीकरण
पोर्चुगल र कङ्गोको खेलपछि आजै राति समूह ‘के’ कै अर्को खेलमा उज्बेकिस्तान र कोलम्बिया पनि भिड्दैछन्। पोर्चुगलका लागि यो खेल जित्दै सुखद सुरुवात गर्नु अनिवार्य छ, किनभने रोनाल्डोको शब्दमा भन्नुपर्दा— “सबैभन्दा महत्त्वपूर्ण कुरा राम्रो सुरुवात हो।”