युरोपमा प्रचण्ड गर्मीको कहर: फ्रान्समा विद्युत सेवा अवरुद्ध, बेलायत र इटालीमा ‘रेड अलर्ट’ जारी

लन्डन/पेरिस (एजेन्सी) ।  यतिबेला पश्चिमी युरोप भीषण गर्मीको चपेटामा परेको छ। तापक्रमले ऐतिहासिक रेकर्डहरू तोड्दै जाँदा जनजीवन अस्तव्यस्त बनेको छ भने फ्रान्समा हजारौँ मानिसहरू विद्युत सेवाबाट वञ्चित भएका छन्।

फ्रान्समा सन् १९४७ पछिकै गर्मी, विद्युत संकट र मानवीय क्षति
अन्तर्राष्ट्रिय सञ्चारमाध्यमका अनुसार फ्रान्समा सन् १९४७ मा मापन सुरु भएयताकै सबैभन्दा गर्मी दिन रेकर्ड गरिएको छ। मंगलबार यहाँको राष्ट्रिय औसत तापक्रम २९.८ डिग्री सेल्सियस पुगेको छ। अत्यधिक गर्मीका कारण ट्रान्सफर्मरमा प्राविधिक समस्या आउँदा उत्तर-पश्चिमी विभाग फिनिस्टेरे  का ६८,००० भन्दा बढी घरधुरी अन्धकारमा परेका छन्।

मंगलबार साँझसम्म फ्रान्सका करिब १ लाख ६ हजार ग्राहक विद्युत सेवाबाट प्रभावित भएका थिए। अधिकारीहरूका अनुसार ९० प्रतिशतभन्दा बढी फ्रान्सेली जनसंख्या अहिले चरम गर्मीको जोखिममा छन्। तापक्रम ३९ देखि ४१ डिग्री सेल्सियससम्म पुग्ने अनुमान गरिएको छ।

गर्मीकै बीचमा हृदयविदारक घटनाहरू पनि सार्वजनिक भएका छन्। प्रचण्ड गर्मीबाट बच्न जलाशयमा पौडी खेल्ने क्रममा कम्तीमा ४८ जनाको डुबेर मृत्यु भएको छ। त्यस्तै, कारभित्रै तातो हावाका कारण दुई बालबालिकाले ज्यान गुमाएका छन्। गर्मी बढ्दा देशभर पङ्खा र एयर कन्डिसनरको माग अत्यधिक बढेको छ।

बेलायतमा विद्यालय बन्द र रेल सेवा प्रभावित
बेलायतको मौसम विभाग  ले बुधबार र बिहीबारका लागि ‘रेड’ हिट हेल्थ अलर्ट जारी गरेको छ। बेलायतको इतिहासमा यो दोस्रो पटक मात्र यस्तो उच्च तहको चेतावनी जारी गरिएको हो। लन्डन र दक्षिणी बेलायतमा तापक्रम ३९ डिग्री सेल्सियस पुग्न सक्ने प्रक्षेपण गरिएको छ।

गर्मीका कारण बेलायतका कैयौँ विद्यालयहरू बन्द गरिएका छन् भने रेल सेवाहरू कटौती गरिएको छ। रेल ट्र्याकहरू अत्यधिक तापक्रमले बिग्रन सक्ने जोखिमका कारण यात्रुहरूलाई अत्यावश्यक काममा बाहेक यात्रा नगर्न सुझाव दिइएको छ। लन्डन र पेरिस जोड्ने युरोस्टार रेल सेवाले पनि आफ्ना केही उडानहरू रद्द गरेको छ।

इटाली र स्पेनको अवस्था
इटालीको स्वास्थ्य मन्त्रालयले रोम, मिलान र भेनिससहित १६ सहरमा ‘रेड अलर्ट’ जारी गरेको छ। यता स्पेनमा गर्मीका कारण दुई वृद्धको मृत्यु भइसकेको छ। यद्यपि, स्पेनमा बुधबारदेखि तापक्रम केही घट्ने अनुमान गरिएको छ।

पूर्वी युरोपतर्फ सर्दै गर्मीको लहर
मौसमविद्हरूका अनुसार पश्चिमी युरोप पछि यो गर्मीको लहर अब पूर्वी युरोपतर्फ सर्दैछ। पोल्यान्डमा सन् १९२१ को ४०.२ डिग्री सेल्सियसको रेकर्ड टुट्न सक्ने भन्दै उच्च सतर्कता अपनाउन भनिएको छ। क्रोएसिया र हंगेरीमा पनि तापक्रम बढ्दै गएपछि चेतावनीको स्तर बढाइएको छ।

किन भइरहेछ यस्तो?
विज्ञहरूका अनुसार वायुमण्डलीय चापका कारण तातो हावा एकै ठाउँमा थुप्रिएर बस्दा तापक्रम लगातार बढिरहेको हो। वैज्ञानिकहरूले यसलाई जलवायु परिवर्तनको प्रत्यक्ष असरको रूपमा व्याख्या गरेका छन्। मानवनिर्मित जलवायु परिवर्तनका कारण यस्ता ‘हिटवेभ’हरू पहिलेभन्दा लामो, तीव्र र बारम्बार भइरहेका छन्।

युरोपका अधिकांश संरचनाहरू चरम गर्मीलाई थेग्न सक्ने गरी नबनाइएका कारण अहिले पूर्वाधारमा ठूलो दबाब परेको विज्ञहरूको भनाइ छ।