फिफा विश्वकप २०२६: समूह चरणको समापनसँगै ‘राउन्ड अफ ३२’ को समीकरण पूरा, यस्ता छन् ५ मुख्य आकर्षण
काठमाडौँ, १४ असार । उत्तर अमेरिकामा जारी फिफा विश्वकप २०२६ को समूह चरणका रोमाञ्चक ७२ खेलहरू समाप्त भएका छन्। ४८ टोलीको सहभागिता रहेको यस ऐतिहासिक विश्वकपमा अनेकौं उलटफेर, कीर्तिमान र नाटकीय नतिजाहरू देखिएका छन्। जुन ११ मा मेक्सिको सिटीमा मेक्सिको र दक्षिण अफ्रिकाबीचको उद्घाटन खेलबाट सुरु भएको यो महाकुम्भ अब नकआउट चरणमा प्रवेश गरेको छ।
समूह चरणको अन्तिम खेलमा अस्ट्रिया र अल्जेरियाले डलासको मैदानमा ३-३ गोलको रोमाञ्चक बराबरी खेल्दै यस चरणको विट मारेका छन्। यसपटकको विश्वकपले दर्शक उपस्थितिमा समेत नयाँ इतिहास रचेको छ। फिफाका अनुसार, प्रतियोगिता सकिन तीन हप्ता बाँकी छँदै ३६ लाखभन्दा बढी दर्शकले रंगशालामा पुगेर खेल हेरिसकेका छन्, जसले सन् २०२२ को कतार विश्वकप (३४ लाख) को रेकर्डलाई उछिनेको छ।
विश्वकप २०२६ को समूह चरणबाट निस्किएका ५ मुख्य ‘टेक-अवे’ हरू यस प्रकार छन्:
१. युरोप र दक्षिण अमेरिकाकै वर्चस्व, अफ्रिकाको छलाङ
परम्परागत रूपमा फुटबलको शक्ति केन्द्र मानिने युरोप र दक्षिण अमेरिकी टोलीहरूले यसपटक पनि आफ्नो दबदबा कायम राखेका छन्। फ्रान्सले समूह चरणका सबै खेल जित्दै आफूलाई मुख्य दाबेदारको रूपमा प्रस्तुत गरेको छ। यस्तै, नर्वेले पनि आफ्नो रणनीतिक कौशल देखाउँदै अन्तिम १६ को यात्रा तय गरेको छ।
दक्षिण अमेरिकाबाट अर्जेन्टिना, ब्राजिल र कोलम्बिया आ-आफ्नो समूहको विजेता बन्दै अघि बढेका छन् भने इक्वेडरले जर्मनी जस्तो बलियो टोलीलाई स्तब्ध पार्दै नकआउटमा स्थान सुरक्षित गरेको छ।
यसपटकको सुखद पक्ष भनेको अफ्रिकी टोलीहरूको प्रदर्शन हो। सहभागी १० मध्ये ९ अफ्रिकी टोलीहरू अर्को चरणमा प्रवेश गरेका छन्। सन् २०२२ को सेमिफाइनलिस्ट मोरक्कोले यसपटक आफ्नो रक्षात्मक शैलीलाई परिवर्तन गर्दै आक्रामक फुटबल खेलिरहेको छ। प्रशिक्षक मोहम्मद उहाबीको नेतृत्वमा मोरक्कोले हाइटीलाई ४-२ ले हराउँदै उपाधि दाबेदारको संकेत दिएको छ।
२. घरेलु टोली अमेरिका: कति बलियो, कति कमजोर?
प्रशिक्षक माउरिसियो पोचेटिनोको आगमनसँगै अमेरिकी टोलीले विश्वकप जित्ने सपना देख्न थालेको छ। समूह चरणको सुरुआतमा पाराग्वेलाई ४-१ र अष्ट्रेलियालाई २-० ले हराउँदा अमेरिका निकै बलियो देखिएको थियो। तर, टर्कीसँगको ३-२ को हारले अमेरिकी टोलीको केही कमजोरीहरू पनि उजागर गरेको छ। मुख्य खेलाडीहरूको चोट र दोस्रो रोजाइका खेलाडीहरूको प्रदर्शनमा देखिएको असन्तुलन पोचेटिनोका लागि नकआउट चरणअघि चिन्ताको विषय बनेको छ।
३. लियोनेल मेस्सीको कीर्तिमानी लय
३९ वर्षको उमेरमा पनि लियोनेल मेस्सीले फुटबल जगतलाई मन्त्रमुग्ध पारिरहेका छन्। उनले समूह चरणका ३ खेलमा ६ गोल गर्दै गोल्डेन बुटको दौडमा आफूलाई सबैभन्दा अगाडि राखेका छन्। यसैक्रममा मेस्सीले जर्मनीका मिरोस्लाभ क्लोजको विश्वकपमा सर्वाधिक गोल गर्ने कीर्तिमानलाई समेत भंग गरेका छन्।
आफ्नो अन्तिम विश्वकप खेलिरहेका मेस्सीले क्रिस्टियानो रोनाल्डोको तुलनामा आफ्नो खेल शैलीलाई समय अनुकूल ढालेका छन्। उनको प्लेमेकिङ क्षमता र ऊर्जा जोगाएर खेल्ने शैलीले अर्जेन्टिनालाई फेरि पनि उपाधि नजिक पुर्याउने अनुमान गरिएको छ।
४. ‘अन्डरडग’ टोलीहरूको उचाइ
यसपटकको ४८ टोलीको संरचनाले साना टोलीहरूलाई पनि आफ्नो क्षमता देखाउने अवसर दिएको छ। केप भर्डेले स्पेन र उरुग्वे जस्ता पूर्व विजेताहरू रहेको समूहबाट दोस्रो हुँदै नकआउटमा पुगेर सबैलाई आश्चर्यचकित पारेको छ।
त्यस्तै, हाइटी र प्रजातान्त्रिक गणतन्त्र कङ्गोले ५२ वर्षपछि विश्वकपमा पुनरागमन गर्दै स्तरीय फुटबल पस्किएका छन्। कुराकाओले जर्मनी विरुद्ध गोल गर्नु र इक्वेडरलाई बराबरीमा रोक्नु यस विश्वकपको अविस्मरणीय क्षणमध्ये एक बन्यो। इराकले पनि १९८६ पछि पहिलो पटक विश्वकपमा गोल गर्दै आफ्नो उपस्थितिको सम्मान राख्यो।
५. इरानको अभागी बहिर्गमन
यस विश्वकपको सबैभन्दा दुर्भाग्यपूर्ण क्षण इरानको बहिर्गमन रह्यो। समूह चरणका तीनवटै खेलमा बराबरी खेलेर अपराजित रहे तापनि इरान अर्को चरणमा पुग्न असफल भयो। मैदानबाहिर अमेरिकी अधिकारीहरूबाट ‘पर्साेना नन ग्राटा’ (अवाञ्छित व्यक्ति) को व्यवहार खेपेको इरानलाई मैदानभित्र पनि भाग्यले साथ दिएन।
अन्ततः, समूह चरणको यो उत्साहजनक यात्रा सकिएसँगै अब विश्वको नजर नकआउट चरणका ‘गर या मर’ का खेलहरूमा केन्द्रित भएको छ। के मेस्सीले आफ्नो कीर्तिमानी यात्रालाई उपाधिसम्म पुर्याउलान् वा कुनै नयाँ शक्तिले विश्व फुटबलमा कब्जा जमाउला? प्रतिक्षा बाँकी नै छ।
