विश्वकपमा साउदी अरबको निराशाजनक प्रदर्शन: फुटबल संघका अध्यक्षद्वारा राजीनामा

रियाद , १५ असार । सन् २०२६ को फिफा विश्वकपको समूह चरणबाटै बाहिरिएपछि साउदी अरब फुटबल महासंघका अध्यक्ष यासिर अल-मिसेहालले आफ्नो पदबाट राजीनामा दिएका छन्। तीन पटकको एसियाली च्याम्पियन साउदी अरब समूह ‘एच’ को पुछारमा रहँदै प्रतियोगिताबाट बाहिरिएपछि उनले ‘नैतिक जिम्मेवारी’ लिँदै पद त्यागेका हुन्।

खराब नतिजा र समूह चरणको बहिर्गमन
साउदी अरबले यस विश्वकपमा आशलाग्दो प्रदर्शन गर्न सकेन। समूह चरणका तीन खेलमध्ये दुईमा बराबरी र एकमा हार बेहोर्दै साउदीले मात्र २ अंक जोड्यो। उरुग्वेसँग १–१ को बराबरी र विश्वकपमा डेब्यु गरिरहेको केप भर्डसँग गोलरहित बराबरी खेलेको साउदी अन्तिम खेलमा उपाधि दाबेदार स्पेनसँग ४–० को फराकिलो अन्तरले पराजित भएको थियो।

‘हारको पूर्ण जिम्मेवारी म लिन्छु’
आइतबार राति सामाजिक सञ्जाल ‘एक्स’ मार्फत राजीनामाको घोषणा गर्दै अल-मिसेहालले लेखेका छन्, “राष्ट्रिय टोली अर्को चरणमा पुग्न नसक्नु हाम्रो आकांक्षा र लक्ष्यभन्दा निकै कमजोर नतिजा हो। यसको पूर्ण जिम्मेवारी म लिन्छु र टोलीबाट राम्रो प्रदर्शनको आशा राख्ने सबै समर्थकहरूसँग माफी माग्दछु।”

उनले साउदी फुटबलमा नयाँ अध्याय सुरु गर्न मार्गप्रशस्त गर्दै आफ्नो कार्यकाल बाँकी छँदै राजीनामा दिएको बताएका छन्। मिसेहाल विगत सात वर्षदेखि साउदी फुटबलको नेतृत्व सम्हालिरहेका थिए।

अर्बौँको लगानी र महत्त्वाकांक्षी योजनामा धक्का
मिसेहालको नेतृत्वमा साउदी अरबले सन् २०३४ को विश्वकप आयोजना गर्ने अधिकार सुरक्षित गरेको थियो। साउदीले पछिल्लो तीन वर्षमा फुटबल क्षेत्रमा झन्डै २ अर्ब डलर लगानी गरेको छ। क्रिस्टियानो रोनाल्डो, नेयमार र करिम बेन्जेमा जस्ता विश्वप्रसिद्ध खेलाडीहरूलाई साउदी प्रो लिगमा भित्र्याएर विश्वकै ध्यान खिचेको साउदीका लागि विश्वकपको यो नतिजा ठूलो धक्का मानिएको छ।

खराब प्रदर्शनकै कारण यसअघि इटालियन प्रशिक्षक रोबर्टो मान्सिनीलाई प्रतिस्थापन गर्न आएका फ्रान्सेली प्रशिक्षक हर्भ रेनार्डले पनि आफ्नो दोस्रो कार्यकाल बीचमै टुङ्ग्याउनु परेको थियो।

एसियाली टोलीहरूको अवस्था
यस विश्वकपमा सहभागी एसियाली टोलीमध्ये जापान र अस्ट्रेलिया मात्र अन्तिम ३२ (राउण्ड अफ ३२) मा पुग्न सफल भए भने साउदी अरबसहित अन्य सात टोली समूह चरणबाटै बाहिरिएका छन्। सन् १९९४ को विश्वकपमा अन्तिम १६ सम्म पुगेको साउदी त्यसयता नकआउट चरणमा पुग्न संघर्षरत छ।

मिसेहालको राजीनामासँगै अब साउदी फुटबलले सन् २०३४ को विश्वकप आयोजनाको तयारी र राष्ट्रिय टोलीको पुनर्संरचनाका लागि नयाँ नेतृत्वको खोजी गर्नेछ।(स्रोतः अन्तराष्ट्रिय न्यूज एजेन्सी)