सदर चिडियाखानामा बर्डफ्लु नियन्त्रणउन्मुख: असार १२ यता नयाँ सङ्क्रमण देखिएन, कहिले खुल्छ चिडियाखाना?

ललितपुर, १६ असार । ललितपुरको जावलाखेलस्थित सदर चिडियाखानामा देखिएको बर्डफ्लु सङ्क्रमण अहिले नियन्त्रणमा आएको छ। गत असार ५ गते सङ्क्रमण पुष्टि भएपछि बन्द गरिएको चिडियाखानामा पछिल्लो चार दिनयता कुनै नयाँ सङ्क्रमण नदेखिएको प्रशासनले जनाएको छ।

सङ्क्रमण देखिएलगत्तै चिडियाखाना प्रशासनले प्रभावित क्षेत्रलाई सिल गरी नियन्त्रणात्मक उपायहरू अवलम्बन गरेको थियो। भाइरसको फैलावट रोक्न जीवजन्तुका खोरहरूमा निरन्तर औषधि छर्किने र बिरामी पन्छीहरूको उपचार गर्ने कार्यलाई प्राथमिकता दिइएको छ।

चिडियाखानाका सूचना अधिकारी गणेश कोइरालाका अनुसार पछिल्लो परीक्षणका आधारमा असार १२ गतेयता नयाँ सङ्क्रमण देखिएको छैन। “हामीले सङ्क्रमण नियन्त्रणका लागि सरसफाइ र जैविक सुरक्षामा कडाइ गरेका छौँ,” कोइरालाले भने, “पछिल्ला केही दिनको नतिजा उत्साहजनक छ र सङ्क्रमण नियन्त्रणउन्मुख देखिएको छ।”

बर्डफ्लुको वास्तविक अवस्था अध्ययन गर्न चिडियाखानामा एउटा ‘बर्डफ्लु नियन्त्रण अध्ययन समिति’ गठन गरिएको छ। उक्त समितिले अहिले चिडियाखानाभित्रको स्वास्थ्य अवस्था र सुरक्षा मापदण्डबारे विस्तृत अध्ययन गरिरहेको छ।

समितिले केही दिनभित्रै आफ्नो प्रतिवेदन बुझाउने र त्यसका आधारमा विज्ञहरूको सुझाव लिएर मात्र चिडियाखाना पुनः सञ्चालनबारे निर्णय गरिने प्रशासनले जनाएको छ। सर्वसाधारणको स्वास्थ्य र जीवजन्तुको सुरक्षामा कुनै जोखिम नहुने सुनिश्चित भएपछि मात्र ढोका खोलिने सूचना अधिकारी कोइरालाले बताए।

चिडियाखानाभित्र अवस्था सामान्य बन्दै गए पनि पशु सेवा विभागले काठमाडौँ उपत्यकामा बर्डफ्लुको जोखिम अझै टरिनसकेको चेतावनी दिएको छ। उपत्यकाका विभिन्न क्षेत्रमा पन्छीहरूमा सङ्क्रमण फैलिने क्रम जारी रहेकाले विशेष सावधानी अपनाउन विभागले आग्रह गरेको छ।

असारको मध्यमा सधैँ पर्यटक र विद्यार्थीको भिड हुने चिडियाखाना बन्द हुँदा यसको आम्दानीमा समेत असर पुगेको छ। यद्यपि, प्रशासनले आर्थिक पक्षभन्दा स्वास्थ्य सुरक्षालाई नै पहिलो प्राथमिकतामा राखिएको स्पष्ट पारेको छ।