केनको दुई गोलमा डिआर कंगोलाई हराउँदै इंग्ल्याण्ड अन्तिम १६ मा
काठमाडौँ, १७ असार । इंग्ल्याण्डले संघर्षपूर्ण जित निकाल्दै डिआर कंगोलाई पराजित गरेको छ। फिफा विश्वकप २०२६ को राउन्ड अफ ३२ अन्तर्गत बुधबार भएको खेलमा इंग्ल्याण्डले २–१ को पुनरागमन जित निकाल्दै अन्तिम १६ मा स्थान सुरक्षित गरेको हो।
खेलको सातौं मिनेटमै ब्रायन सिपेङ्गाले गोल गर्दै डिआर कंगोलाई अग्रता दिलाएका थिए। सुरुदेखि नै संगठित र अनुशासित रक्षापंक्ति प्रस्तुत गरेको डिआर कंगोले पहिलो हाफभर इंग्ल्याण्डलाई दबाबमा राखेको थियो। इंग्ल्याण्डले बराबरीका केही अवसर सिर्जना गरे पनि गोल गर्न सकेन। पहिलो हाफमा ह्यारी केनमाथि भएको फललाई रेफ्रीले पेनाल्टी नदिँदा इंग्ल्याण्ड थप निराश बनेको थियो।
दोस्रो हाफमा खेलमा फर्किएको इंग्ल्याण्डका लागि कप्तान ह्यारी केन नायक बने। उनले लगातार दुई गोल गर्दै टोलीलाई २–१ को अग्रता दिलाए र खेल जिताए। डिआर कंगोले अन्तिम समयसम्म बराबरी गोलको प्रयास गरे पनि सफल हुन सकेन।
यो जितसँगै इंग्ल्याण्डले अन्तिम १६ मा स्थान बनाएको छ, जहाँ उसले मेक्सिकोसँग प्रतिस्पर्धा गर्नेछ। डिआर कंगो भने पहिलो पटक नकआउट चरण पुगेको ऐतिहासिक अभियान समाप्त गर्दै प्रतियोगिताबाट बाहिरिएको छ।
