वर्षा र पहिरोको कहर : नौ प्रमुख राजमार्ग पूर्ण रूपमा ठप्प, दर्जनौँ सडक प्रभावित
काठमाडौँ, साउन ८ । अविरल वर्षासँगै खसेको पहिरो र सडक कटानका कारण देशभरको यातायात प्रणाली नराम्ररी प्रभावित भएको छ। नेपाल प्रहरीले आज बिहान ६ बजे सार्वजनिक गरेको पछिल्लो विवरण अनुसार, मुलुकका विभिन्न भागका नौवटा प्रमुख सडकखण्डहरू पूर्ण रूपमा अवरुद्ध भएका छन् ।
समय सीमा तोकिएका सडकखण्डहरू:
बाढी र पहिरोको उच्च जोखिमलाई मध्यनजर गर्दै केही व्यस्त सडकहरूमा सवारी सञ्चालनमा समय सीमा तोकिएको छ। बिपी राजमार्गको काभ्रेपलाञ्चोक-सिन्धुली जोड्ने खुर्कोट-नेपालथोक-कटुन्जेबेँसी खण्डमा साँझ ६:०० बजेदेखि बिहान ४:०० बजेसम्म सवारी चलाउन रोक लगाइएको छ। त्यसैगरी, कान्ति लोकपथमा पनि वर्षायामभर साँझ ५:०० बजेदेखि बिहान ५:०० बजेसम्म सवारीसाधन सञ्चालनमा प्रतिबन्ध लगाइएको छ।
पूर्ण रूपमा अवरुद्ध मुख्य राजमार्ग र सडकहरू:
प्रहरीका अनुसार पहिरो र हिलोका कारण सडक खण्डहरूमा यातायात पूर्ण रूपमा ठप्प भएको छ ।
मेची राजमार्ग : इलामको राजदुवालीमा सडक हिलाम्मे हुँदा अवरुद्ध
अरनिको राजमार्ग : सिन्धुपाल्चोकको जिरोकिलो र कोदारी क्षेत्रमा पहिरोका कारण बन्द
कालीगण्डकी करिडोर : बागलुङको बेलबगरमा पहिरो खसेपछि यातायात ठप्प
सहिद राजमार्ग : रोल्पाको घोराही–थवाङ खण्डमा पहिरोले अवरोध
नाग्म-गमगडी सडक : मुगुको पिना खोला क्षेत्रमा सडक बन्द
पासाङ ल्हामु सडकखण्ड : रसुवाको गोसाइँकुण्ड गाउँपालिका क्षेत्रमा पहिरो
मध्यपहाडी लोकमार्ग : अछामको पानीखोला खण्डमा यातायात अवरुद्ध
बेँसीसहर-चामे-मनाङ सडक : लमजुङको म्याग्दे भीरमा पहिरोका कारण सडक पूर्ण बन्द
वैकल्पिक मार्गको व्यवस्था:
दोलखाको लामासाँघु–रामेछाप सडकखण्डमा तामाकोशी नदीले सडक कटान गरेपछि मुख्य मार्ग अवरुद्ध भएको छ। यद्यपि, प्रहरीले खिम्ती ग्रामीण विद्युत् सहकारी संस्थाको परिसर हुँदै वैकल्पिक मार्गबाट यातायात सञ्चालनमा ल्याइएको जानकारी दिएको छ।
मनसुन सक्रिय रहेकाले थप पहिरो जान सक्ने जोखिमलाई ध्यानमा राखी यात्रा गर्नुअघि सडकको अवस्थाबारे जानकारी लिन र सतर्कता अपनाउन सुरक्षा निकायले सर्वसाधारणमा अपिल गरेको छ ।
