रियाद ।  यमनका हुथी विद्रोहीहरूबाट साउदी अरेबियामाथि भइरहेका लगातारका र आक्रामक हमलाहरू तीव्र बनेपछि साउदी अरेबिया, टर्की र पाकिस्तानले आफ्ना सेना प्रमुखहरूको आपत्कालीन बैठक बोलाउने तयारी गरेका छन्। साउदी परराष्ट्र मन्त्रालयका अनुसार पछिल्लो क्षेत्रीय सुरक्षा चुनौतीलाई सम्बोधन गर्न यो उच्चस्तरीय सैन्य बैठक बस्न लागेको हो।

संयुक्त राष्ट्रसङ्घीय महासभाको साइडलाइनमा न्युयोर्कमा भएको उच्चस्तरीय कूटनीतिक भेटवार्तापछि यो निर्णय बाहिर आएको हो। बैठकमा साउदी विदेशमन्त्री प्रिन्स फैसल बिन फरहान, पाकिस्तानका उपप्रधानमन्त्री तथा परराष्ट्रमन्त्री इसाक दार र टर्कीका परराष्ट्रमन्त्री हकन फिडान सहभागी थिए।

गत अगस्ट ७ मा यी तीन राष्ट्रबीच हस्ताक्षर भएको ‘मक्का संयुक्त रक्षा सम्झौता’ को प्रावधानअनुसार यो आपत्कालीन बैठक बस्न लागेको हो। उक्त सामरिक सम्झौतामा तीन देशमध्ये कुनै एकमाथि हुने आक्रमणलाई सबैमाथिको आक्रमण सरह मानेर सामूहिक प्रतिवाद गर्ने बलियो प्रतिबद्धता जनाइएको छ।

हुथी विद्रोहीको आक्रमण र सुरक्षा चिन्ता

हालैका दिनहरूमा हुथी विद्रोहीहरूले साउदी अरेबियाका विभिन्न सहरहरूलाई लक्षित गर्दै ब्यालिस्टिक क्षेप्यास्त्र तथा ड्रोन आक्रमणहरू तिब्र बनाएका छन्। राजधानी रियाद, ताइफ र यान्बु लगायतका सामरिक क्षेत्रमा प्रहार गरिएका क्षेप्यास्त्रहरूलाई साउदी वायु रक्षा प्रणालीले विफल पारेको गठबन्धन सेनाले जनाएको छ। पवित्र धार्मिक स्थल मक्का र नागरिक पूर्वाधारहरूलाई लक्षित गरी भएका यी हमलाहरूप्रति तीनै देशका मन्त्रीहरूले कडा शब्दमा आपत्ति जनाएका छन्।

सेना प्रमुखहरूको आगामी संयुक्त बैठकमा सुरक्षा सहयोगलाई थप सुदृढ बनाउने, मक्का रक्षा सम्झौताको प्रभावकारी कार्यान्वयन गर्ने र साउदी अरेबियालाई आवश्यक पर्ने सैन्य सहायता उपलब्ध गराउने विषयमा ठोस रणनीतिमाथि छलफल हुनेछ। विश्लेषकहरूले यस कदमलाई खाडी क्षेत्रको जटिल बन्दै गएको सुरक्षा परिस्थितिमा एक नयाँ सामरिक गठबन्धनको रूपमा हेरेका छन्।