बैंकक । केही समयअघिसम्म थाइल्यान्डका स्थानीय रात्रिकालीन बजारहरूमा गिटार बजाएर दर्शक बटुल्ने १६ वर्षीया थाई रकस्टार नेने रोयल (रत्तिकाड अम्लोय) अब विश्वका चर्चित मेटल ब्यान्डको मञ्चमा छाउने भएकी छन्। चर्चित अमेरिकी रियालिटी शो ‘अमेरिकाज गट ट्यालेन्ट’ (AGT – सिजन २१) को उपाधि जित्दै १० लाख अमेरिकी डलर पुरस्कार हात पारेकी नेनेले विश्व प्रसिद्ध अमेरिकी रक ब्यान्ड ‘अभ्यान्ज्ड सेभेनफोल्ड’  को सिङ्गापुर कन्सर्टमा मुख्य प्रस्तुति अघि (ओपनिङ एक्ट) आफ्नो साङ्गीतिक प्रस्तुति दिने भएकी हुन्।

कन्सर्ट आयोजक तथा नेनेको आधिकारिक इन्स्टाग्राम पेजमार्फत बिहीबार सार्वजनिक जानकारी अनुसार आगामी अक्टोबर १३ मा सिङ्गापुरमा आयोजना हुने अभ्यान्ज्ड सेभेनफोल्डको एसियाली भ्रमण कन्सर्टमा उनी “विशेष अतिथि”का रूपमा मञ्चमा उत्रिनेछिन्।

नाइटकलब र बजारदेखि एजीटी उपाधिसम्मको यात्रा

थाइल्यान्डको पर्यटकीय टापु फुकेटमा जन्मिएकी र ७ वर्षको उमेरदेखि आफैँ गिटार बजाउन सिकेकी नेने रोयलको साङ्गीतिक यात्रा निकै लोभलाग्दो छ। ‘अमेरिकाज गट ट्यालेन्ट’को २१ औँ सिजनको छनोट चरणमा द क्रेनबेरिज (The Cranberries) को प्रसिद्ध गीत ‘जोम्बी’ (Zombie) मा प्रस्तुत गरेको शक्तिशाली गिटार सोलो र गायकीले उनलाई रातारात विश्वभर चर्चित बनाएको थियो।

उक्त अडिसनको भिडियो टिकटकमा मात्रै १६ करोड ५० लाखभन्दा बढी पटक हेरिसकिएको छ। प्रतिस्पर्धाका क्रममा निर्णायक मेल बी (Scary Spice) बाट ‘गोल्डेन बझर’ पाएर सिधै लाइभ शोमा पुगेकी नेनेले फाइनल चरणमा चर्चित अमेरिकी रक ब्यान्ड लिन्किन पार्क) सँगै मञ्च साझा गरेकी थिइन्।

अन्तिम प्रतिस्पर्धामा म्या जादूगर जिनो प्लोगरलाई पछि पार्दै विजेता घोषित हुँदा १६ वर्षीया नेने मञ्चमै भावुक भएकी थिइन्।

थाइल्यान्डमा खुसीको लहर, राष्ट्रिय नायकको दर्जा

नेनेको यो ऐतिहासिक सफलतासँगै ७ करोड १० लाख जनसङ्ख्या भएको थाइल्यान्डमा उत्सवको माहोल छ। उनी ‘अमेरिकाज गट ट्यालेन्ट’ जित्ने पहिलो थाई नागरिक बनेकी छन्।

• सरकारी सम्मान र सहयोग: थाइल्यान्डका प्रधानमन्त्री अनुतिन चानविराकुलले नेनेलाई बधाई दिँदै उनले सम्पूर्ण थाई जनताको शिर उच्च बनाएको बताएका छन्। थाइ सरकारले उनलाई देशको राष्ट्रिय प्रेरणाका रूपमा घोषणा गरेको छ।

• दिग्गज कलाकारको साथ: थाइल्यान्डका चर्चित रक गायक एड क्याराबाओले नेने र उनको परिवारलाई अमेरिका आउजाउ गर्न १० लाख थाई बाट (करिब ३० हजार अमेरिकी डलर) आर्थिक सहयोग प्रदान गरेका थिए।

• टाइम्स स्क्वायरमा स्थान र उपहार: न्युयोर्कको प्रतिष्ठित टाइम्स स्क्वायरस्थित डिजिटल डिस्प्लेमा थाई व्यापारिक घराना सीपी ग्रुपले नेनेको तस्बिरसहित बधाई सन्देश प्रदर्शन गरेको थियो। साथै, उक्त समूहले उनलाई बैंककमा एउटा विलासी अपार्टमेन्ट (कन्डो) समेत उपहार दिएको छ।

आगामी सपना: विश्व भ्रमण र नयाँ साङ्गीतिक एल्बम

अमेरिकाज गट ट्यालेन्ट जितेपछि इन्टरटेनमेन्ट विक्लीसँग कुरा गर्दै नेनेले भनिन्— “प्रतियोगिता जित्नु मेरो जीवनको सबैभन्दा ठूलो सपनामध्ये एक थियो। अब मेरो ध्यान आफ्ना मौलिक गीतहरू रेकर्ड गर्ने, डेब्यु साङ्गीतिक एल्बम (EP) सार्वजनिक गर्ने र विश्व भ्रमण गर्नेमा केन्द्रित हुनेछ।”

आफ्ना बाल्यकालका प्रेरणा मानिएका अभ्यान्ज्ड सेभेनफोल्ड र मेटालिका  जस्ता विश्वविख्यात ब्यान्डहरूसँग मञ्च साझा गर्ने अर्को सपना पनि अब छिट्टै पूरा हुन लागेकोमा उनले खुसी व्यक्त गरेकी छन्।