चितवन, १३ असोजः नारायणी नदीमा आएको बाढीले बगाएर नवलपरासी (बर्दघाट सुस्तापश्चिम)को सुस्ता पुर्‍याएको गैँडालाई उद्धार गरी चितवन राष्ट्रिय निकुञ्जको कसरा ल्याउने तयारी गरिएको छ ।

चितवन राष्ट्रिय निकुञ्ज, राष्ट्रिय प्रकृति संरक्षण कोष र डिभिजन वन कार्यालय, नवलपरासी (बर्दघाट सुस्तापश्चिम)को प्राविधिक टोलीले गैँडालाई ‘डार्ट’ गरी उद्धार गर्न लागेको हो । उद्धारका लागि हात्तीसहितको टोली सुस्ता पुगेको छ ।

चितवन राष्ट्रिय निकुञ्जका संरक्षण अधिकृत मधु नेपाली र राष्ट्रिय प्रकृति संरक्षण कोषका डा अमित सडौलाको नेतृत्वमा टोली सोमबार नै सुस्ता पुगेको थियो । आज दिउँसो नवलपरासीको लौघारीबाट दुईवटा हात्ती पुगेपछि गैँडालाई नियन्त्रणमा लिने तयारी गरिएको हो ।

निकुञ्जका सूचना अधिकारी अबिनास थापामगरका अनुसार गैँडालाई डार्ट गरी नियन्त्रणमा लिएपछि ट्रकमार्फत कसरा ल्याइनेछ । झाडीमा रहेकाले गैँडाको उमेर र लिङ्ग यकिन गर्न नसकिए पनि टाढाबाट गरिएको अवलोकनका आधारमा करिब पाँच वर्षको पोथी गैँडा हुनसक्ने प्राविधिकको अनुमान छ ।

नारायणी नदीमा आएको ठूलो बाढीका कारण गैँडा नदी तटीय क्षेत्रबाट बगेर सुस्ता गाउँपालिका–४ पुगेको हो । हालसम्म बाढीले बगाएर सुस्ता पुगेको एउटा गैँडाको मात्रै जानकारी प्राप्त भएको भए पनि अन्य गैँडा तथा वन्यजन्तु पनि बाढीले बगाएर भारततर्फ पुगेको हुनसक्ने अनुमान गरिएको छ ।

यसअघि २०७४ साल साउन २८ गते राप्ती र नारायणी नदीमा आएको ठूलो बाढीका क्रममा पनि चितवनबाट धेरै गैँडा बगेर सुस्ता हुँदै भारतीय भूमिमा पुगेका थिए । तत्कालीन चितवन राष्ट्रिय निकुञ्जका प्रमुख संरक्षण अधिकृत डा रामचन्द्र कँडेलका अनुसार त्यसबेला भारतीय भूमिमा पुगेका १२ वटा गैँडाको उद्धार गरी नेपाल ल्याइएको थियो ।

चितवन राष्ट्रिय निकुञ्जमा पछिल्लो गणनाअनुसार ६९४ वटा गैँडा रहेका छन् ।