भक्तपुर, असोज २३। नेकपा (एमाले) का अध्यक्ष केपी शर्मा ओलीले अहिलेको अन्तरिम सरकारले तमासा गरिरहेको आरोप लगाउनु भएको छ । उहाँले यो सरकार हाहाहुहुबाट बनेको सरकार भएको पनि अरोप लगाउनुभयो । ओलीले यो विदेशीले बनाएको सरकार भएको भन्दै आफ्नो पासपोर्ट रोक्का गर्ने काम तमासा भएको पनि आरोप लगाउनुभयो ।

‘सुशीला कार्कीको डरले केपी ओली भाग्छ ?,’ उहाँले भन्नुभयो, ‘गृहमन्त्री भाईलाई नहौसिन र नउत्ताउलिन सुझाव दिन्छु ।’ उहाँले यो देशको स्वाभिमानका लागि बलिदान दिन तयार रहेको पनि उल्लेख गर्नुभयो । त्यसैले आफूलाई नजिस्क्याउन पनि चुनौति दिनुभयो ।

‘हामीले जनताको शासन ल्याउँछौँ भनेर लडेका हौँ, ल्यानएका पनि हौँ,’ उहाँले भन्नुभयो, ‘कहिलेकाँही यस्तो पनि हुँदो रहेछ । अहिले देशमाथि हमला भएको छ । षडयन्त्रको मतियार भएर को–को आउँछन् हामी सामना गर्न तयार छौँ । उहाँले जेनजीप्रति आफ्नो उच्च सम्मान रहेको भन्दै जेनजी भनेर केही युवालाई भ्रममा पारेर नेपालको अस्मिता लुट्ने प्रयास भएको उहाँको भनाई छ । ‘प्ट्रोल जेनजीले फ्याँकेको हो ? होइन,’ उहाँले भन्नुभयो, ‘जेनजीका नाममा पछि बसेर अरुले गरेका हुन् ।’ उहाँले अराजकता स्थायी नहुने भन्दै देशलाई कानुनी राजमा फर्काउने पनि चुनौति दिनुभयो ।