काठमाडौं असार ११ । थापेलो मासेकोको दोस्रो हाफको निर्णायक गोलमा दक्षिण अफ्रिकाले दक्षिण कोरियालाई १–० ले पराजित गर्दै फिफा विश्वकप २०२६ को नकआउट चरणमा पहिलो पटक स्थान सुरक्षित गरेको छ।

समूह ‘ए’ अन्तर्गत बुधबार मोन्टेरे स्टेडियममा सम्पन्न खेल दुवै टोलीका लागि ‘गर या मर’ को अवस्थामा थियो। हार्ने टोली प्रतियोगिताबाट बाहिरिने निश्चितजस्तै रहेकाले खेल निकै प्रतिस्पर्धात्मक बनेको थियो। अन्ततः दक्षिण अफ्रिकाले अवसरको सदुपयोग गर्दै ऐतिहासिक सफलता हात पार्यो।

खेलको सुरुआतमा दक्षिण अफ्रिकाले केही राम्रो अवसर सिर्जना गरेको थियो। मासेकोको तीव्र गतिमा अघि बढेको आक्रमणलाई दक्षिण कोरियाका डिफेन्डर ली गिह्युकले अन्तिम क्षणमा विफल बनाएका थिए। त्यसपछि थालेन्ते म्भाथा र एभिडेन्स मकगोपाका प्रहारलाई गोलरक्षक किम सुङग्युले उत्कृष्ट बचाउ गरे।

गोलरहित बराबरीमा सकिएको पहिलो हाफपछि दक्षिण कोरियाले आक्रामक रणनीति अपनायो। प्रशिक्षक होङ म्युङ-बोले दोस्रो हाफमा तीन खेलाडी परिवर्तन गर्दै स्टार फरवार्ड सोन ह्युंग–मिनलाई मैदानमा उतारे। तर लगातार आक्रमण गरिरहेको कोरियामाथि दक्षिण अफ्रिकाले प्रभावकारी काउन्टर आक्रमणमार्फत प्रहार गर्यो।

खेलको ६३औँ मिनेटमा टेशपाङ मोरेमीले बायाँ भागबाट दिएको पासलाई मासेकोले नियन्त्रणमा लिएर उत्कृष्ट फिनिसिङ गर्दै गोल गरे। त्यही गोल खेलको निर्णायक गोल सावित भयो।

बाँकी समयमा दक्षिण कोरियाले बराबरी गोलका लागि प्रयास गरे पनि दक्षिण अफ्रिकाको रक्षापंक्तिलाई भेद्न सकेन। अन्ततः दक्षिण अफ्रिकाले १–० को ऐतिहासिक जित निकाल्दै अन्तिम ३२ मा स्थान सुरक्षित गर्यो।

यस जितसँगै दक्षिण अफ्रिकाले तीन खेलबाट चार अंक जोड्दै समूह ‘ए’ को उपविजेताका रूपमा नकआउट चरणमा प्रवेश गरेको छ। समूह विजेता मेक्सिको नौ अंकसहित शीर्ष स्थानमा रह्यो। पराजित दक्षिण कोरिया तीन अंकमै सीमित रहँदै प्रतियोगिताबाट बाहिरिएको छ।

२२ वर्ष २२५ दिनका मासेको विश्वकपमा दक्षिण अफ्रिकाका लागि गोल गर्ने दोस्रो सबैभन्दा कान्छा खेलाडी बनेका छन्। उत्कृष्ट प्रदर्शन गरेका मासेको खेलको ‘प्लेयर अफ द म्याच’ घोषित भए।

नकआउट चरणमा दक्षिण अफ्रिकाले जुन २८ मा लस एन्जलसमा समूह ‘बी’ को उपविजेतासँग प्रतिस्पर्धा गर्नेछ।