विश्वकपमा केप भर्डेको ऐतिहासिक यात्रा जारी, अपराजित रहँदै अन्तिम ३२ मा प्रवेश
काठमाडौँ, १३ असार । फिफा विश्वकप २०२६ मा पहिलोपटक सहभागी भएको अफ्रिकी राष्ट्र केप भर्डेले ऐतिहासिक उपलब्धि हासिल गरेको छ। समूह चरणको अन्तिम खेलमा साउदी अरेबियालाई पराजित गर्दै केप भर्डे अपराजित रहँदै पहिलोपटक विश्वकपको अन्तिम ३२ (नकआउट चरण) मा प्रवेश गरेको हो।
विश्व फुटबलमा ‘अन्डरडग’ मानिएको केप भर्डेले प्रतियोगिताभर उत्कृष्ट प्रदर्शन गर्दै सबैको ध्यान खिचेको छ। पहिलो खेलमा युरोपियन च्याम्पियन स्पेनसँग गोलरहित बराबरी खेलेको उसले दोस्रो खेलमा दुई पटकको विश्व च्याम्पियन उरुग्वेलाई २–२ को बराबरीमा रोक्दै सनसनी मच्चाएको थियो। त्यसपछि अन्तिम समूह खेलमा साउदी अरेबियामाथि जित निकाल्दै नकआउट चरणमा स्थान सुरक्षित गर्यो।
झन्डै पाँच लाख जनसंख्या भएको सानो द्वीपीय राष्ट्र केप भर्डेका लागि यो उपलब्धि विश्वकप इतिहासकै सबैभन्दा ठूलो सफलतामध्ये एक मानिएको छ। प्रतियोगिताको सुरुदेखि नै अनुशासित रक्षापङ्क्ति, उत्कृष्ट गोलकिपिङ र सामूहिक खेलका कारण टोलीले बलिया प्रतिद्वन्द्वीलाई समेत दबाबमा राख्न सफल भएको हो।
विश्वकपमा डेब्यु गर्दै अपराजित रहँदै नकआउट चरणमा पुग्ने टोलीको रूपमा केप भर्डे अहिले प्रतियोगिताको ‘सर्प्राइज प्याकेज’ बनेको छ। अब उसले अन्तिम ३२ मा अझ बलियो प्रतिद्वन्द्वीसँग प्रतिस्पर्धा गर्नेछ, जहाँ अर्को इतिहास रच्ने लक्ष्यसहित मैदान उत्रने अपेक्षा गरिएको छ।
