काठमाडौं, असार १३ । फिफा विश्वकप २०२६ अन्तर्गत समूह ‘जी’ को अन्तिम खेलमा बेल्जियमले न्युजिल्यान्डमाथि ५–१ को प्रभावशाली जित निकाल्दै समूह विजेताका रूपमा अन्तिम ३२ मा प्रवेश गरेको छ।

यसअघि इजिप्ट र इरानसँग बराबरीमा रोकिएर दबाबमा परेको बेल्जियमले निर्णायक खेलमा उत्कृष्ट प्रदर्शन गर्‍यो। लिआन्ड्रो ट्रोसार्डले दुई गोल गर्दै टोलीको जितको आधार तयार पारे। केभिन डे ब्रुयनले एक गोलसँगै दुई असिस्ट गर्दै खेलको उत्कृष्ट प्रदर्शन गरे। दोस्रो हाफमा रोमेलु लुकाकु र एलेक्सिस सालेमाकर्सले थप एक–एक गोल गरे।

खेलको २८औँ मिनेटमा ट्रोसार्डले डे ब्रुयनको कर्नरलाई सदुपयोग गर्दै बेल्जियमलाई अग्रता दिलाएका थिए। दोस्रो हाफको सुरुआतमै उनले व्यक्तिगत दोस्रो गोल गर्दै अग्रता दोब्बर बनाए। त्यसपछि ६६औँ मिनेटमा ट्रोसार्डकै पासमा डे ब्रुयनले गोल गरेपछि बेल्जियम ३–० ले अघि बढ्यो।

न्युजिल्यान्डका एलिजाह जस्टले ८४औँ मिनेटमा एक गोल फर्काएर अन्तर घटाए पनि त्यसपछि बेल्जियमले थप दुई गोल गर्‍यो। ८६औँ मिनेटमा वैकल्पिक खेलाडी लुकाकुले गोल गरे भने इन्जुरी समयमा सालेमाकर्सले गोल थप्दै ५–१ को शानदार जित सुनिश्चित गरे।

यो जितसँगै बेल्जियमले तीन खेलबाट सात अंक जोड्दै गोलअन्तरका आधारमा समूह ‘जी’ को शीर्ष स्थान कब्जा गर्‍यो। समान सात अंक भए पनि इजिप्ट दोस्रो स्थानमा रह्यो। इजिप्टले इरानसँग १–१ को बराबरी खेलेको थियो। इरान उत्कृष्ट तेस्रो स्थानको टोलीका रूपमा अर्को चरण पुग्ने सम्भावना कायम राख्दै तेस्रो स्थानमा रह्यो भने न्युजिल्यान्ड एक अंकसहित समूहको पुछारमा रहँदै प्रतियोगिताबाट बाहिरियो।

अब बेल्जियमले अन्तिम ३२ मा समूह ‘ए’, ‘आई’ वा ‘जे’ मध्ये कुनै एक समूहको उत्कृष्ट तेस्रो स्थानमा रहेको टोलीसँग प्रतिस्पर्धा गर्नेछ।