ट्रम्पको टेलिफोनपछि फिफाको ‘यु-टर्न’: रातो कार्ड पाएका अमेरिकी स्ट्राइकर बालोनले बेल्जियमविरुद्ध खेल्न पाउने

न्युयोर्क, २२ असार । फिफा विश्वकप २०२६ को एउटा नाटकीय घटनाक्रममा अमेरिकी राष्ट्रपति डोनल्ड ट्रम्पको हस्तक्षेपपछि फिफाले अमेरिकी स्ट्राइकर फोलारिन बालोनमाथिको प्रतिबन्ध फुकुवा गरेको छ। फिफाको यो निर्णयसँगै बालोनले सोमबार सिएटलमा हुने बेल्जियमविरुद्धको अन्तिम १६ को खेल खेल्न पाउने भएका छन्।

के थियो घटना?
बोस्निया र हर्जगोभिना विरुद्धको खेलमा प्रतिपक्षी खेलाडीको गोलीगाँठामा कुल्चिएपछि भिडियो असिस्टेन्ट रेफ्री (VAR) को सहयोगमा बालोनलाई सिधै रातो कार्ड दिइएको थियो। सामान्यतया सिधै रातो कार्ड पाउने खेलाडीले अर्को एक खेल अनिवार्य गुमाउनुपर्ने नियम छ। तर, फिफाको अनुशासन समितिले आफ्नो नियमावलीको ‘धारा २७’ प्रयोग गर्दै बालोनको प्रतिबन्धलाई एक वर्षको ‘प्रोवेसनरी पिरियड’ मा राखेर तत्कालका लागि निलम्बन गरिदिएको छ।

ट्रम्पको भूमिका र विवाद
सीएनएनका अनुसार राष्ट्रपति ट्रम्पले फिफा अध्यक्ष जियानी इन्फान्टिनोसँग फोनमा कुराकानी गर्दै बालोनको रातो कार्डबारे पुनर्विचार गर्न आग्रह गरेका थिए। ट्रम्पले सामाजिक सञ्जाल ‘ट्रुथ सोसल’ मार्फत फिफालाई “न्याय गरेकोमा” धन्यवाद समेत दिएका छन्। आयोजक राष्ट्रका प्रभावशाली खेलाडीलाई जोगाउन राष्ट्रपतिकै तहबाट भएको यस हस्तक्षेपलाई फुटबल जगतमा चासो र आलोचनाका साथ हेरिएको छ।

विपक्षको आक्रोश
बेल्जियम फुटबल संघले फिफाको यो निर्णयको कडा विरोध गरेको छ। बेल्जियमले यसलाई फिफाकै नियम विपरित र ‘फेयर प्ले’ को सिद्धान्त विरुद्ध भएको बताएको छ। बेल्जियमका प्रशिक्षक रुडी गार्सियाले फिफाको निर्णयप्रति व्यङ्ग्य गर्दै यसले फुटबलको नैतिकतामाथि प्रश्न उठाएको टिप्पणी गरेका छन्।

यता अमेरिकी प्रशिक्षक माउरिसियो पोचेटिनोले भने बालोनलाई दिइएको रातो कार्ड नै अन्यायपूर्ण भएको दाबी गर्दै फिफाको पछिल्लो निर्णयलाई ‘सही’ ठहर गरेका छन्।

पुरानो नजिर
यसअघि पोर्चुगलका कप्तान क्रिस्टियानो रोनाल्डोको हकमा पनि फिफाले यस्तै नियम प्रयोग गरेर प्रतिबन्ध कम गरेको नजिर छ। बालोन हाल अमेरिकाका लागि उच्च लयमा रहेका स्ट्राइकर हुन्, जसले यस प्रतियोगितामा ४ खेलमा ३ गोल गरिसकेका छन्।