नेतान्याहुलाई पक्राउ गर्ने स्वतन्त्र कानुनी अधिकार न्युयोर्क सहरसँग छैन: मेयर ममदानी

एजेन्सी, ६ साउन । न्युयोर्कका मेयर जोहरान ममदानीले इजरायली प्रधानमन्त्री बेन्जामिन नेतान्याहुविरुद्ध अन्तर्राष्ट्रिय फौजदारी अदालत (आइसिसी) ले जारी गरेको पक्राउ पुर्जी कार्यान्वयन गर्ने स्वतन्त्र कानुनी अधिकार न्युयोर्क सहरसँग नरहेको स्पष्ट पार्नुभएको छ। त्यसका लागि अमेरिकी सङ्घीय सरकारले आवश्यक कदम चाल्नुपर्ने उहाँको भनाइ छ।

सामाजिक सञ्जालमार्फत सार्वजनिक गर्नुभएको भिडियो सन्देशमा मेयर ममदानीले नेतान्याहु न्युयोर्क आएमा आइसिसीको पक्राउ पुर्जी कार्यान्वयन गर्न सकिने वा नसकिने विषयमा आफ्नो प्रशासनले लागू कानुनका सबै पक्षको समीक्षा गरेको जानकारी दिनुभयो। त्यसक्रममा न्युयोर्क सहरसँग उक्त पक्राउ पुर्जी कार्यान्वयन गर्ने स्वतन्त्र कानुनी अधिकार नभएको निष्कर्षमा पुगिएको उहाँले बताउनुभयो। सङ्घीय सरकारसँग भने यस्तो अधिकार रहने उल्लेख गर्दै उहाँले संयुक्त राज्य अमेरिकालाई आइसिसीसँग सहकार्य गरी पक्राउ पुर्जी कार्यान्वयन गर्न आग्रह गर्नुभयो।

हेगस्थित आइसिसीले सन् २०२४ मा गाजा युद्धसँग सम्बन्धित कथित युद्ध अपराध तथा मानवताविरुद्धका अपराधमा नेतान्याहु जिम्मेवार रहेको विश्वास गर्ने पर्याप्त आधार रहेको भन्दै उहाँविरुद्ध पक्राउ पुर्जी जारी गरेको थियो। यो मुद्दा सन् २०२३ अक्टोबर ७ मा हमासले इजरायलमाथि गरेको आक्रमणपछि गाजामा इजरायलले सञ्चालन गरेको सैन्य कारबाहीसँग सम्बन्धित छ।

यसैबीच, अमेरिकी राष्ट्रपति डोनाल्ड ट्रम्पले नेतान्याहु आगामी सेप्टेम्बरमा न्युयोर्कमा हुने संयुक्त राष्ट्रसङ्घको महासभामा सहभागी भए पक्राउको सामना गर्नुपर्ने अवस्था नआउने आश्वासन दिनुभएको थियो। मेयर ममदानीले भिडियो सन्देशमा गाजामा भएको विनाशलाई विश्वले गम्भीर रूपमा हेर्नुपर्ने बताउँदै आफू आइसिसीको अवधारणा अनुसार नेतान्याहुलाई पक्राउ गरी आरोपबमोजिम कानुनी प्रक्रिया अघि बढाइनुपर्ने पक्षमा रहेको उल्लेख गर्नुभयो। उहाँले आइसिसीले अभियोग लगाएका अन्य सबै व्यक्तिको हकमा पनि समान कानुनी मापदण्ड लागू हुनुपर्ने धारणा व्यक्त गर्नुभयो। यता, नेतान्याहुको कार्यालयले भने मेयर ममदानीको अभिव्यक्तिको खण्डन गर्दै आइसिसीलाई ‘कङ्गारु अदालत’ को संज्ञा दिएको छ।