चिकित्सकको आन्दोलनले देशभरका अस्पताल ठप्प : बिरामी मर्कामा, आकस्मिक सेवा मात्र सञ्चालन

काठमाडौँ, १२ साउन । नेपाल चिकित्सक सङ्घको आह्वानमा आज देशभरका स्वास्थ्य संस्थाहरूमा आकस्मिक बाहेकका सम्पूर्ण सेवाहरू बन्द गरिएका छन् । वीरगन्जस्थित नारायणी अस्पतालका चिकित्सक र स्वास्थ्यकर्मीमाथि भएको साङ्घातिक आक्रमण तथा पर्सा जिल्ला प्रशासन कार्यालयमा भएको दुर्व्यवहारको विरोधमा सङ्घले देशभरका अस्पतालमा सेवा ठप्प पारेको हो ।

सङ्घको निर्णय अनुसार देशभरका सरकारी, गैरसरकारी तथा निजी अस्पतालहरूमा बहिरङ्ग (ओपिडी) लगायतका नियमित स्वास्थ्य सेवाहरू स्थगित गरिएको छ । चिकित्सक र स्वास्थ्यकर्मीको सुरक्षाको प्रत्याभूति, दोषीमाथि कडा कानुनी कारबाही र कार्यस्थलमा सुरक्षित वातावरण सुनिश्चित हुनुपर्ने मुख्य माग राख्दै सङ्घ आन्दोलनमा उत्रिएको हो ।

अस्पतालहरूमा सेवा बन्द भएपछि उपचारका लागि पुगेका बिरामी र उनीहरूका आफन्तहरू प्रत्यक्ष मर्कामा परेका छन् । राजधानीका प्रमुख अस्पतालहरू वीर अस्पताल, त्रिभुवन विश्वविद्यालय शिक्षण अस्पताल (टिचिङ) र सिभिल अस्पतालमा बिरामीहरूको ठुलो भिड लागेको छ । ती अस्पतालहरूमा आकस्मिक सेवा सुचारु रहे पनि अन्य सेवाहरू बन्द हुँदा टाढा–टाढाबाट आएका सेवाग्राहीहरू उपचार नपाई फर्कन बाध्य भएका छन् । कतिपय बिरामीहरूले आकस्मिक कक्षमार्फत नै सेवा लिन खोज्दा आकस्मिक विभागमा चाप अस्वाभाविक रूपमा बढेको छ ।

सङ्घले आफ्ना मागहरू अविलम्ब सम्बोधन नभए थप सशक्त आन्दोलनका कार्यक्रमहरू सार्वजनिक गर्ने चेतावनी दिएको छ । यता, सरकारले भने नारायणी अस्पतालको घटनाप्रति गम्भीर ध्यानाकर्षण भएको जनाउँदै दोषीहरूको पहिचान गरी कानुनी कारबाहीको प्रक्रिया अगाडि बढाइसकेको जानकारी दिएको छ ।