अमेरिका र इरानबीच ‘मैत्रीपूर्ण’ वार्ता सुरु, ट्रम्प र नेतान्याहुबीच भेटवार्ता हुँदै

वासिङ्टन डीसी/तेहरान । अमेरिकी राष्ट्रपति डोनाल्ड ट्रम्पले वासिङ्टन र तेहरानबीच ‘निकै मैत्रीपूर्ण’ वार्ता भइरहेको खुलासा गरेका छन्। यद्यपि, उनले इरानसँगको वार्तालाई लामो समयसम्म नलम्ब्याउने संकेतसमेत दिएका छन्।

इरानसँगको तनाव उत्कर्षमा पुगेकै बेला राष्ट्रपति ट्रम्पको यो बयान आएको हो। ट्रम्पले इरानसँग ठोस सहमतिको सम्भावना रहेको बताउँदै हाललाई अमेरिकी सैन्य हमला रोकिएको जानकारी दिए। “हामी अहिले इरानसँग सकारात्मक छलफलमा छौँ, र एउटा निकास निस्कने राम्रो सम्भावना छ,” ट्रम्पले भने, “तर यदि वार्ता असफल भएमा सैन्य कारबाही पुनः सुरु हुन सक्छ।”

यसैबीच, इजरायली प्रधानमन्त्री बेन्जामिन नेतान्याहु अमेरिका पुगेका छन्। उनले वासिङ्टनमा राष्ट्रपति ट्रम्पसँग भेटवार्ता गर्ने कार्यक्रम छ। यो भेटवार्तामा मुख्य रूपमा ‘इरान विरुद्धको युद्ध’ र क्षेत्रीय सुरक्षाको विषयमा केन्द्रित रहेर छलफल हुने बताइएको छ।

क्षेत्रीय कूटनीतिमा इरानको सक्रियता
अमेरिकी दबाब र सैन्य उपस्थितिका बीच इरानले पनि क्षेत्रीय मित्र राष्ट्रहरूसँगको संवादलाई तीव्र पारेको छ। इरानी विदेशमन्त्री अब्बास अराघचीले ओमान र साउदी अरबका आफ्ना समकक्षीहरूसँग टेलिफोन वार्ता गर्दै ‘हर्मुज जलडमरूमध्य’  को सुरक्षाका विषयमा छलफल गरेका छन्।

इरानी समाचार एजेन्सी ‘इर्ना’  का अनुसार, ओमानका विदेशमन्त्री बदर अल्बुसैदी र साउदी विदेशमन्त्री राजकुमार फैसल बिन फरहान अल साउदसँगको कुराकानीमा यस क्षेत्रमा भइरहेको अमेरिकी ‘आक्रामक गतिविधि’ ले असुरक्षा निम्त्याएको आरोप लगाइएको छ। तीन देशका कूटनीतिज्ञहरूले क्षेत्रीय स्थिरताका लागि संयुक्त प्रयास जारी राख्ने प्रतिबद्धता जनाएका छन्।

साउदी अरबमा ड्रोन आक्रमण
यसैबीच, साउदी अरबले इराकस्थित इरान समर्थित समूहहरूले गरेको ड्रोन आक्रमणको कडा शब्दमा निन्दा गरेको छ। उक्त ड्रोनहरूले साउदीको राजधानी रियाद र पूर्वी प्रान्तमा रहेका तेल सुविधाहरूलाई लक्षित गरेका थिए। साउदी अधिकारीहरूले यसलाई ऊर्जा सुरक्षा र विश्व बजारमाथिको प्रहार भनेका छन्।

विश्व बजारमा तेलको मूल्य घट्यो
अमेरिका र इरानबीच वार्ता सुरु भएको र सैन्य हमला रोकिएको खबर बाहिरिएसँगै अन्तर्राष्ट्रिय बजारमा कच्चा तेलको मूल्यमा गिरावट आएको छ।

समाचार एजेन्सी रोयटर्सका अनुसार, सोमबार ब्रेन्ट क्रुडको मूल्य १.६६ प्रतिशतले घटेर प्रतिब्यारेल ८६.८९ डलर कायम भएको छ, जुन विगत आठ दिनयताकै न्यून बिन्दु हो। त्यसैगरी, अमेरिकी वेस्ट टेक्सास इन्टरमिडिएट (WTI) को मूल्य पनि १.७६ प्रतिशतले घटेर ८१.१६ डलरमा झरेको छ। लगानीकर्ताहरूले दुई देशबीचको तनाव कम हुने अपेक्षा गरेपछि बजारमा यस्तो प्रभाव देखिएको हो।

तेहरानले भने अमेरिका अहिले युद्धबाट उम्कने बाटो खोजिरहेको टिप्पणी गरेको छ। मध्यपूर्वी क्षेत्रमा बढ्दो तनाव र कूटनीतिक दौडधुपलाई विश्वभर निकै चासोका साथ हेरिएको छ।