हङकङद्वारा नेपालसामु २६२ रनको लक्ष्य, सन्दीप लामिछानेको ४ विकेट
काठमाडौँ, २३ भदौ । एसीसी पुरुष प्रिमियर कप क्रिकेट प्रतियोगिताअन्तर्गत समूह चरणको आफ्नो अन्तिम खेलमा नेपालले हङकङबाट २६२ रनको चुनौतीपूर्ण लक्ष्य पाएको छ । मलेसियाको क्वालालाम्पुरस्थित बायुमास ओभल मैदानमा टस जितेर पहिले ब्याटिङ रोजेको हङकङले निर्धारित ५० ओभरमा ७ विकेट गुमाउँदै २६१ रनको योगफल तयार पारेको हो ।
हङकङलाई बलियो स्कोरमा पुर्याउन मध्यक्रमका ब्याटर बाबर हयातले उत्कृष्ट शतकीय पारी खेले । उनी ११७ रनमा अविजित रहे । हङकङका लागि शाहिद वसिफले ४५ रन जोडे भने एहसान खान ३५ रनमा नटआउट रहे । त्यस्तै, जिशन अलीले १५ रनको योगदान दिए ।
नेपाली बलरहरूमध्ये कप्तान सन्दीप लामिछानेले सर्वाधिक सफलता हात पारे । उनले हङकङका ४ महत्वपूर्ण विकेट लिए । सन्दीपलाई बलियो साथ दिएका शेर मल्लले ३ विकेट झारे । हङकङका अन्य ब्याटरहरूलाई नेपाली स्पिन जोडीले खुलेर खेल्न दिएनन् ।
प्रतियोगितामा हालसम्म खेलेका तीनवटै खेलमा अपराजित रहेको नेपाल ६ अङ्कसहित समूह ‘ए’ को शीर्ष स्थानमा छ । आजको खेल जितेमा नेपाल अपराजित रहँदै समूह विजेताको रूपमा सेमिफाइनल प्रवेश गर्नेछ ।
नेपालले यसअघि पहिलो खेलमा बहराइनलाई ७ विकेट, दोस्रो खेलमा आयोजक मलेसियालाई ६ विकेट र तेस्रो खेलमा साउदी अरेबियालाई ५ विकेटले पराजित गरिसकेको छ । नेपाल अहिले २६२ रनको लक्ष्य पछ्याउँदै जवाफी ब्याटिङको तयारीमा छ ।
