भक्तपुर, भदौ २९ । भक्तपुरको दरबार स्क्वायरस्थित केदारनाथ मन्दिर हरितालिका तीजको उपलक्ष्यमा पहिलोपटक सर्वसाधारणका लागि आज खुला गरिएको छ। तत्कालीन राजा यक्ष मल्लद्वारा स्थापित उक्त मन्दिर केदारनाथको दर्शनका लागि आज खोलिएको संस्कृति अध्येता गणेश रञ्जितकारको भनाइ छ।

मन्दिरका पुजारी प्रमिलराज सुवेदीका अनुसार यसअघि यो मन्दिर वर्षमा दुईपटक मात्र — बुद्ध जयन्ती (वैशाख पूर्णिमा) र महाशिवरात्रिका दिन मात्र खोलिँदै आएको थियो। तीजमा व्रत बसेका सर्वसाधारणलाई दर्शन सहज बनाउन यसपालि बिहानैदेखि मन्दिर खुला गरिएको हो, र दिनभरि नै खुला रहने जनाइएको छ।

मन्दिर खुलेसँगै त्यहाँ दर्शनार्थी महिलाहरूको भीड बाक्लै देखिएको छ। स्थानीय सबिना बोहजुले यो मन्दिर पहिलोपटक दर्शन गर्न पाएकामा खुसी व्यक्त गर्दै २०७२ सालको भूकम्पमा मन्दिर भत्किँदा भित्रको महादेवको मूर्ति बाहिरैबाट मात्र दर्शन गर्नुपरेको सम्झिन्। “आज भित्र पसेर दर्शन गर्ने मौका मिल्यो,” उनले भनिन्।

चारधाममा एकैसाथ हुनेछ भव्य महाआरती

भक्तपुर सम्पदा संरक्षण समूहका संयोजक सत्यराम सुवालले हरितालिका तीज २०८३ को अवसरमा दरबार स्क्वायरकै प्रसिद्ध चारधाम क्षेत्रमा एकैसाथ र एकै समयमा भव्य महाआरती सञ्चालन गरिने जानकारी दिए। धार्मिक तथा आध्यात्मिक महत्त्वको यो कार्यक्रममा व्रतालु महिला लगायत ठूलो सङ्ख्यामा श्रद्धालुको सहभागिता रहने अपेक्षा गरिएको छ।

सुवालले साँझ हुने महाआरतीलाई सभ्य, भव्य र व्यवस्थित ढङ्गले सफल बनाउन सम्पूर्ण श्रद्धालु तथा भक्तजनलाई हार्दिक निमन्त्रणा गरेका छन्।