न्यूयोर्क ।  संयुक्त राष्ट्रसङ्घीय महासभा (UNGA) को क्रममा अमेरिकी र इरानी प्रतिनिधिमण्डलबीच भएको उच्चस्तरीय भेटवार्तालाई लिएर दुवै देशले महत्त्वपूर्ण प्रगति भएको सङ्केत गरेका छन्। अमेरिकी राष्ट्रपति डोनल्ड ट्रम्पले न्यूयोर्कमा पत्रकारहरूसँग कुरा गर्दै इरानी नेतृत्वसँग करिब तीन घण्टा लामो “अत्यन्त सकारात्मक” छलफल भएको पुष्टि गर्नुभएको छ।

अन्तर्राष्ट्रिय समाचार संस्थाहरूका अनुसार इरानका परराष्ट्र मन्त्री अब्बास अरागची र अमेरिकाका विशेष दूत स्टिभ विटकफबीच न्यूयोर्कमा यो दुर्लभ वार्ता भएको हो। दुवै देशबीच तनाव उत्कर्षमा पुगेका बेला भएको यस भेटलाई कूटनीतिक वृत्तमा अर्थपूर्ण रूपमा हेरिएको छ।

हर्मुज जलडमरूमध्यको अवस्थाबारे मुख्य केन्द्रित

इरानी सरकारी सञ्चारमाध्यमहरूका अनुसार यो बैठक अमेरिकी पक्षको विशेष आग्रह र ताकेतापछि आयोजना गरिएको हो। वार्ता मुख्य गरी सामरिक दृष्टिले महत्त्वपूर्ण हर्मुज जलडमरूमध्य (Strait of Hormuz) को सुरक्षा स्थिति र सहज आवागमनका लागि इरानले अघि सारेका सर्तहरूका विषयमा केन्द्रित थियो।

तेहरानस्थित सुरक्षा स्रोतहरूलाई उद्धृत गर्दै अन्तर्राष्ट्रिय सञ्चारमाध्यमहरूले जनाए अनुसार, यदि अमेरिकाले इरानका मुख्य माग र सर्तहरू पूरा गरेमा कूटनीतिक संवादलाई अझ अघि बढाउन इरान तयार रहेको छ।

मध्यस्थतामार्फत लामो छलफल

अमेरिकी विशेष दूत स्टिभ विटकफले सामाजिक सञ्जाल ‘एक्स’ (X) मा जानकारी दिँदै महासभाका दौरान इरानी प्रतिनिधिमण्डलसँग लामो छलफल भएको बताउनुभएको छ। दुई देशबीच प्रत्यक्ष वार्ताको साटो मध्यस्थकर्ताहरूले दिनभर दुवै पक्षबीच संवाद गराएका थिए।

दूत विटकफले यो चरणको वार्ता सफलतापूर्वक सम्पन्न भएको र यसले सकारात्मक नतिजा ल्याउने आशा व्यक्त गर्नुभएको छ। राष्ट्रपति ट्रम्पका अनुसार दुई देशका प्रतिनिधिहरूबीच निकट भविष्यमै अर्को बैठक समेत तय भइसकेको छ।