वाशिङटन / मियामी ।  तीव्र गतिमा बलियो बन्दै गएको एक ट्रपिकल डिप्रेसन छिट्टै शक्तिशाली ‘हुरी’ मा परिणत हुने देखिएको छ। यसले यसै साता अमेरिकाको दक्षिणी क्षेत्रमा भारी वर्षा र तीव्र हावाहुरीसहित ठूलो प्रभाव पार्ने चेतावनी मौसमविद्हरूले दिएका छन्।

मंगलबार साँझसम्मको तथ्यांक अनुसार ‘ट्रपिकल डिप्रेसन नाइन’ मा प्रतिघण्टा ३५ माइलको गतिमा हावा बगिरहेको छ भने यो मिसिसिपी नदीको मुखबाट करिब ६०० माइल दक्षिणमा अवस्थित छ। यो प्रणाली युकाटन प्रायद्वीपभन्दा पूर्वतर्फ सर्दै शुक्रबारसम्ममा उत्तरतर्फ मोडिने र द्रुत गतिमा विकास हुँदै प्रतिघण्टा १०० माइलको गतिसहित श्रेणी २  को हुरीमा परिणत हुने प्रक्षेपण गरिएको छ।

भारी वर्षा, आँधी र बाढीको जोखिम
शुक्रबारदेखि सुरु हुने यस प्रणालीका कारण दक्षिण लुइजियानादेखि फ्लोरिडा प्यानह्यान्डलसम्मका क्षेत्रहरूमा अत्यधिक वर्षा, शक्तिशाली हावाहुरी र समुद्री आँधीआउने प्रबल सम्भावना रहेको छ। साथै, आँधीका बाहिरी घेराहरूले तटिय क्षेत्रमा असर पार्दा धेरै स्थानमा ससाना टोर्नेडो  समेत उत्पन्न हुन सक्ने चेतावनी दिइएको छ।

यो आँधी एटलान्टिक क्षेत्रमा यस वर्षको पहिलो हुरी हुनेछ, जसले सम्भावित रूपमा बलियो एल निनो  को प्रभावसँग जोडिएको लामो समयको खडेरीलाई तोड्नेछ। आँधीको वास्तविक मार्ग र जमिनमा ठोक्किने समयमा यसको शक्ति कति हुन्छ भन्ने अझै पूर्ण रूपमा निश्चित भइनसके तापनि लुइजियानादेखि फ्लोरिडाको बिग बेन्डसम्मका तटीय बासिन्दाहरूलाई मौसमको अवस्थालाई नजिकबाट नियाल्न आग्रह गरिएको छ।

फ्लोरिडामा संकटकाल घोषणा, तेल कम्पनीहरू सतर्क
आँधीको जोखिमलाई मध्यनजर गर्दै फ्लोरिडाका गभर्नर रोन डिसेन्टिसले मंगलबार नै २५ वटा काउन्टीहरूमा सङ्कटकाल  घोषणा गर्नुभएको छ। उहाँले बासिन्दाहरूलाई आपत्कालीन योजना तयार पार्न र हुरीका लागि आवश्यक सामग्रीहरू जोहो गर्न अपिल गर्नुभएको छ। राज्यका आपत्कालीन टोलीहरूले टलाहासी र सान्टा रोजा क्षेत्रमा जेनेरेटर, इन्धन, खाद्यान्न, पानी र बाढी नियन्त्रण गर्ने  तयारी अवस्थामा राखेका छन्।

यसैबीच, मेक्सिकोको खाडीमा रहेका तेल कम्पनीहरूले पनि सावधानी अपनाउन थालेका छन्। मंगलबार सार्वजनिक गरिएको विवरणअनुसार ‘शेल’  कम्पनीले आफ्ना ६ वटा अफसोर प्ल्याटफर्मबाट गैर–आवश्यक कर्मचारीहरूलाई हटाउँदैछ भने ‘ब्रिटिस पेट्रालियम’  ले पनि आफ्ना समुद्री सुविधाहरू सुरक्षित गर्दै कर्मचारीहरूलाई बाहिर निकाल्ने काम गरिरहेको छ।