लन्डन।  बर्नमथ  का समर्थकहरूका लागि बिहीबारको रात कुनै रोमाञ्चक सपनाभन्दा कम थिएन। आफ्नो इतिहासकै तेस्रो युरोपेली खेलमा बर्नमथले सात पटकको युरोपेली च्याम्पियन एसी मिलान  लाई ३–० को फराकिलो अन्तरले पराजित गर्दै ऐतिहासिक जित दर्ता गरेको छ।

भाइटालिटी स्टेमडियममा भएको उक्त खेलमा जस्टिन क्लुइभर्ट ले टोलीका लागि पहिलो गोल गरे। ठीक ३१ वर्षअघि उनका पिता प्याट्रिक क्लुइभर्टले आयाक्सका लागि च्याम्पियन्स लिगको फाइनलमा एसी मिलानविरुद्ध नै निर्णायक गोल गरेका थिए।

सन् २००८ मा आर्थिक संकटका कारण लगभग खारेजीको संघारमा पुगेको बर्नमथका प्रशंसकहरूले कुनै दिन क्लुइभर्ट जस्तो ऐतिहासिक नाम आफ्नो क्लबको जर्सीमा देख्न पाइएला भनेर कल्पनासमेत गरेका थिएनन्।

खेलपछि प्रतिक्रिया दिँदै बर्नमथका मिडफिल्डर रायन क्रिस्टीले भने, “यो क्लबको कथाका हिसाबले पत्याउनै नसकिने खालको छ। ठीक १५ वर्षअघि आजकै दिन हामी लिग वानको १७औँ स्थानमा थियौँ भन्ने कुरा कसैले सम्झाएको थियो। टोलीसँगै यो लामो यात्रा तय गरेका समर्थकहरूका लागि यस्ता रातहरू जितका साथ मनाउन पाउनु निकै खास छ।”

तथ्याङ्क र मैदानको वास्तविकता

खेलको अर्को रोचक पक्ष के थियो भने, घरेलु टोली बर्नमथभन्दा भ्रमणकारी टोली एसी मिलानको सुरुवाती ११ मा धेरै अङ्ग्रेजी  खेलाडीहरू समावेश थिए। मिलानमा तीन जना अङ्ग्रेजी खेलाडी मैदान उत्रिँदा बर्नमथले मात्र दुई जनालाई मैदान उतारेको थियो।

खेलको २७औँ मिनेटमा एसी मिलानका गोलकिपर माइक म्यागनन  ले रातो कार्ड पाएपछि मिलान दबाबमा परेको थियो। तर रातो कार्डअघि नै बर्नमथले मैदानमा उत्कृष्ट पकड जमाइसकेको थियो।

यस सिजन इङ्ग्लिस प्रिमियर लिगका सात खेलबाट मात्र छ अङ्क जोडेको बर्नमथको यो प्रदर्शन धेरैका लागि आश्चर्यजनक भए पनि टोलीको युरोपेली यात्रा भने सानदार रहँदै आएको छ। यस सिजन बर्नमथले पराजित गरेका तीन टोलीहरू—रियाल सोसिदाद, स्टर्म ग्राज र एसी मिलान—सबैले पछिल्लो तीन वर्षभित्र युरोपेली च्याम्पियन्स लिग खेलिसकेका छन्।

इङ्ग्लिस प्रिमियर लिगको बढ्दो दबदबा?

बर्नमथका लागि यो नतिजा एउटा परिकथा जस्तै रहे पनि युरोपका अन्य क्लबहरूका लागि भने यो इङ्ग्लिस प्रिमियर लिगको आर्थिक तथा रणनीतिक दबदबाको अर्को डरलाग्दो सङ्केत बनेको छ।

च्याम्पियन्स लिग, युराेपा लिग र कन्फरेन्स लिग गरी तीनवटै युरोपेली उपाधिमा इङ्ग्लिस क्लबहरूको एकछत्र राज कायम हुनबाट आर्सेनलले चुकाएको एक पेनाल्टीले मात्र रोकेको पाँच महिनापछि, बर्नमथको यो जितले युरोपेली फुटबलमा अङ्ग्रेजी क्लबहरूको बढ्दो वर्चस्वलाई पुनः पुष्टि गरेको छ।