ब्रासिलिया, , ९ कात्तिक ।  ब्राजिलको राष्ट्रपति निर्वाचनमा लुइज इनासियो लुला दा सिल्भा चौथो कार्यकालका लागि निर्वाचित भएपछि विभिन्न देशका राष्ट्रप्रमुख, सरकारप्रमुख तथा राजनीतिक नेताहरूले बधाई दिएका छन्। आइतबार भएको दोस्रो चरणको मतदानमा वामपन्थी नेता लुलाले दक्षिणपन्थी सिनेटर फ्लाभियो बोल्सोनारोलाई पराजित गरेका हुन्। रोयटर्स र एएफपीका अनुसार यस जितसँगै लुलाले ब्राजिलको राजनीतिमा ऐतिहासिक चौथो कार्यकाल सुनिश्चित गरेका छन्

पराजित उम्मेदवार बोल्सोनारोले भने मतदानको समय दुई घण्टा थप्ने सर्वोच्च अदालतको निर्णयप्रति आपत्ति जनाउँदै निर्वाचन बदरको माग गर्ने बताएका छन्। दुवै उम्मेदवारका तर्फबाट केही क्षेत्रमा मतदान अवधि थप्न अनुरोध भए पनि देशभर समय विस्तार गर्ने निर्णयलाई बोल्सोनारो पक्षले विवादको विषय बनाएको हो।

मेक्सिको र क्यानडाबाट सहकार्य विस्तारको सन्देश

मेक्सिकोकी राष्ट्रपति क्लाउडिया सेइनबाउमले सामाजिक सञ्जाल एक्समार्फत लुलालाई बधाई दिँदै ब्राजिलका जनताको जित भएको बताएकी छन्।

“लोकतन्त्र अमर रहोस्, ब्राजिलका जनताले जितेका छन्,” उनले लेखेकी छन्।

क्यानडाका प्रधानमन्त्री मार्क कार्नीले क्यानडा र ब्राजिलबीचको सम्बन्ध विस्तारमा लुलाले पुर्‍याएको योगदानको प्रशंसा गरेका छन्। उनले व्यापारिक अवसर सिर्जना, वातावरण संरक्षण तथा दुवै देशका नागरिकको समृद्धिका लागि द्विपक्षीय सम्बन्ध थप सुदृढ बनाउनुपर्ने बताएका छन्।

“नयाँ र सम्भावनायुक्त व्यापारिक अवसर सिर्जना गर्न, वातावरणको रक्षा गर्न र हाम्रा दुवै देशका जनताको समृद्धि सुनिश्चित गर्न यो अवसरलाई मिलेर उपयोग गरौँ,” कार्नीले एक्समा लेखेका छन्।

अमेरिकामा मिश्रित प्रतिक्रिया

अमेरिकाका राजनीतिक व्यक्तित्वहरूबाट भने निर्वाचन परिणामप्रति फरक–फरक प्रतिक्रिया आएका छन्।

अमेरिकी राष्ट्रपति डोनाल्ड ट्रम्पका छोरा डोनाल्ड ट्रम्प जुनियरले मतदान अवधि दुई घण्टा थपिएको विषयलाई लिएर परिणामको आलोचना गरेका छन्। ब्राजिलमा कुनै दक्षिणपन्थी सरकारले यस्तो निर्णय गरेको भए अमेरिकी मूलधारका सञ्चारमाध्यमले चर्को विरोध गर्ने उनको भनाइ छ।

अर्कोतर्फ, सिनेटर बर्नी स्यान्डर्सले लुलाको पुनर्निर्वाचनलाई “असाधारण विजय” भन्दै बधाई दिएका छन्। लुलाले श्रमिक र लोकतन्त्रका पक्षमा उभिँदै आएको उल्लेख गर्दै उनले आगामी चार वर्ष पनि त्यसलाई निरन्तरता दिने विश्वास व्यक्त गरेका छन्।

अमेरिकी प्रतिनिधिसभा सदस्य रो खन्नाले विश्वभरका जनता अतिवादविरुद्ध उभिइरहेको र ब्राजिलमा उनीहरूले जित हासिल गरेको बताएका छन्।

“अधिनायकवादी नेताहरू सधैँ लोकतन्त्रमाथि आक्रमण गर्छन्, किनकि जनताको इच्छासामु उनीहरूको केही चल्दैन,” खन्नाले एक्समा लेखेका छन्। उनले राष्ट्रपति ट्रम्पलाई ब्राजिलको निर्वाचन परिणामको सम्मान गर्न र निर्वाचन प्रक्रियालाई कमजोर नपार्न आग्रहसमेत गरेका छन्।

न्युयोर्क सहरका मेयर जोहरान ममदानीले “एकजुट जनतालाई कहिल्यै पराजित गर्न सकिँदैन” भन्दै प्रतिक्रिया दिएका छन्।

क्यालिफोर्नियाका गभर्नर गेभिन न्युसमको प्रेस कार्यालयले पनि विज्ञप्ति जारी गर्दै लोकतन्त्रको रक्षा, वातावरण संरक्षण, श्रमिक अधिकार सुदृढीकरण र श्रमजीवी परिवारका हितमा काम गर्ने अर्थतन्त्र निर्माणको साझा प्रतिबद्धता भएका ब्राजिललगायत विश्वका साझेदारहरूसँग उभिन पाउँदा गर्व लागेको जनाएको छ।

क्युबाले भन्यो—शान्ति र सामाजिक न्यायको निरन्तरता

क्युबाका राष्ट्रपति मिगेल डियाज–कानेलले लुलाको जितलाई “ऐतिहासिक” भन्दै यसले ब्राजिलका जनताले रोजेको शान्ति, सार्वभौमिकता र सामाजिक न्यायको मार्गलाई निरन्तरता दिने बताएका छन्।

उनले ल्याटिन अमेरिका र क्यारेबियन क्षेत्रको एकता तथा क्षेत्रीय सहकार्य अघि बढाउन ब्राजिलले क्युबाको साथ पाउने उल्लेख गरेका छन्।

चिली, बोलिभिया र पानामाबाट पनि बधाई

चिलीका राष्ट्रपति होसे एन्टोनियो कास्टले टेलिफोनमार्फत लुलालाई बधाई दिएको बताएका छन्। उनले आर्थिक एकीकरण र क्षेत्रीय सङ्गठित अपराधविरुद्धको लडाइँमा दुई देशबीचको सहकार्यलाई थप बलियो बनाउने प्रतिबद्धता व्यक्त गरेका छन्।

“चिली र ब्राजिलको साझा भविष्यमा धेरै सम्भावना छन्। हामी दुई देशबीचको सम्बन्ध सुदृढ बनाउने कार्यसूचीमा काम गरिरहनेछौँ,” उनले एक्समा लेखेका छन्।

बोलिभियाका राष्ट्रपति रोड्रिगो पाजले साझा इतिहास र चुनौतीले बोलिभिया तथा ब्राजिललाई जोडेको बताएका छन्। उनले द्विपक्षीय सम्बन्ध बलियो बनाउँदै दुवै देशका लागि थप अवसर सिर्जना गर्न सहकार्य जारी राख्ने उल्लेख गरेका छन्। पाजको बधाई सन्देश अन्तर्राष्ट्रिय समाचार विवरणमा पनि समेटिएको छ।

पानामाका राष्ट्रपति होसे राउल मुलिनोले ब्राजिलका जनतालाई लोकतान्त्रिक प्रक्रियामा सहभागिताका लागि र लुलालाई विजयका लागि बधाई दिएका छन्।

“हामी आ–आफ्ना देशका हितका लागि मिलेर काम गरिरहनेछौँ,” उनले बताएका छन्।

मतदानको समय विस्तारलाई लिएर विवाद

अन्तर्राष्ट्रिय समर्थन र बधाईका बीच ब्राजिलभित्र भने मतदानको समय विस्तारसम्बन्धी विवाद कायम छ। सर्वोच्च अदालतका न्यायाधीश क्रिस्टियानो जानिनले मतदान केन्द्रसम्म पुग्न सार्वजनिक यातायातमा समस्या भएको लगायतका कारण मतदान अवधि दुई घण्टा थपेका थिए। एएफपीका अनुसार बोल्सोनारो पक्षले पनि भारी वर्षाका कारण केही क्षेत्रमा समय थप्न माग गरेको थियो, तर पछि देशव्यापी विस्तारको विरोध गरेको हो ।

बोल्सोनारोले उक्त निर्णयलाई “अस्वीकार्य” भन्दै परिणाम स्वीकार नगर्ने र निर्वाचन बदरका लागि कानुनी चुनौती दिने बताएका छन्।