काठमाडौँ। अघिल्लो साता एक गिर्जाघर (चर्च) मा भएको घातक आक्रमणको जवाफमा जोर्डनले सिरियाली भूभागमा हवाई आक्रमण गरेको छ। जोर्डनी सेनाले गरेको उक्त आक्रमणमा परी तीन बालबालिका र एक महिलासहित कम्तीमा सात जनाको मृत्यु भएको छ भने केही घाइते भएका छन्।

आक्रमणपछि उत्पन्न तनावका कारण सिरियाले जोर्डनसँग जोड्ने आफ्नो मुख्य नाका पूर्ण रूपमा बन्द गरेको छ।

जोर्डनी सशस्त्र प्रहरीबलका अनुसार गत शुक्रबार जोर्डनको करक प्रान्तस्थित गिर्जाघरमा भएको अन्त्येष्टि समारोहमा बन्दुकधारीहरूले गोली चलाउँदा नौ जनाको मृत्यु हुनुका साथै दर्जन्यौँ घाइते भएका थिए। सोही घटनाको बदला लिन दक्षिण-पूर्वी सिरियामा रहेका हतियारधारी समूहका लुक्ने ठाउँहरूलाई लक्षित गरी आक्रमण गरिएको जोर्डनले जनाएको छ।

जोर्डनको सेनाले सिरियाली सरकारको समन्वयमा नै यो सैन्य कारबाही गरिएको र आक्रमणमा परी कैयौँ आतङ्कवादी मारिनुका साथै उनीहरूका सवारीसाधन नष्ट भएको दाबी गरेको छ।

तर, सिरियाली सरकारले भने जोर्डनको यो दाबीलाई खण्डन गरेको छ। सिरियाली विदेश मन्त्रालयले पूर्वजानकारी वा कुनै समन्वयविना नै जोर्डनले आफ्नो भूभागमा आक्रमण गरेको जनाउँदै यसलाई “धोकापूर्ण कदम” भनेको छ। घटनाबारे अनुसन्धान सुरु गरिएको सिरियाले जनाएको छ।

सिरियाली नागरिक सुरक्षा सेवाका अनुसार सोमबार साँझ डेरा र सुवेदा प्रान्तका कम्तीमा चार ठाउँमा बमबारी भएको थियो। डेरा प्रान्तको अल-ताइ गाउँमा एउटा टेन्टमा भएको आक्रमणमा एकै परिवारका पाँच जना—एक पुरुष, एक महिला र तीन बालबालिकाको ज्यान गएको छ।

यस्तै, डेराकै अल शायाहमा भएको अर्को आक्रमणमा ८० वर्षीय वृद्ध र सुवेदाको शाहबा शहरमा भएको आक्रमणमा ६० वर्षीय अर्का पुरुषको मृत्यु भएको छ।

हवाई आक्रमणलगत्तै सिरियाली सीमा प्राधिकरणले जोर्डनसँग जोड्ने एक मात्र व्यावसायिक तथा यात्रुवाहक नाका ‘नसिब क्रसिङ’ बाट हुने आउजाउ अनिश्चितकालका लागि स्थगित गरेको छ।

यसैबीच, गिर्जाघर आक्रमणमा संलग्न रहेको आशङ्कामा जोर्डनी सुरक्षा फौजले सोमबार अल-जदिदा गाउँबाट तीन जना संदिग्धलाई पक्राउ गरेको छ। करिब तीन घण्टासम्म चलेको दोहोरो मुठभेडपछि उनीहरूलाई गम्भीर घाइते अवस्थामा नियन्त्रणमा लिइएको हो।

जोर्डनका राजा अब्दुल्ला द्वितीयले गिर्जाघर आक्रमणमा संलग्नहरूलाई कडाभन्दा कडा कारबाही गर्ने प्रतिबद्धता जनाएलगत्तै जोर्डनले यी कदम चालेको हो। करक क्षेत्र जोर्डनका अल्पसङ्ख्यक इसाई समुदायको बसोबास रहेको क्षेत्र मानिन्छ।