अर्घाखाँचीको ठाडादहमा पहिलोपटक भेटियो नेपालमा मात्र पाइने दुर्लभ चरा ‘काँडे भ्याकुर’
अर्घाखाँची, १ मङ्सिर । नेपालमा मात्र प्राकृतिक रूपमा पाइने दुर्लभ चरा ‘काँडे भ्याकुर’ अर्घाखाँचीको शितगङ्गा नगरपालिकास्थित ठाडादह क्षेत्रमा पहिलोपटक अभिलेख गरिएको छ । जिल्लाको दक्षिणी क्षेत्रमा यस प्रजातिको उपस्थिति पुष्टि भएपछि स्थानीय जैविक विविधता र पक्षी अध्ययनका दृष्टिले नयाँ जानकारी प्राप्त भएको छ ।
डिभिजन वन कार्यालय अर्घाखाँचीका अनुसार यसअघि जिल्लाको दक्षिणी क्षेत्रमा काँडे भ्याकुर देखिएको अभिलेख थिएन । कार्यालयका सूचना अधिकारी केसर खड्काले नेपालबाहेक अन्य कुनै पनि देशमा प्राकृतिक रूपमा नपाइने यो चरा ठाडादहमा भेटिनु जिल्लाका लागि महत्वपूर्ण उपलब्धि भएको बताउनुभयो ।
अङ्ग्रेजीमा ‘स्पाइनी ब्याब्लर’ नामले चिनिने काँडे भ्याकुरको वैज्ञानिक नाम ‘एकान्थोप्टिला निपालेन्सिस’ हो । यसलाई नेपालको मौलिक जैविक सम्पदाका रूपमा लिइन्छ ।
काँडे भ्याकुर घना झाडी, वनका झाडीदार क्षेत्र तथा प्राकृतिक वनस्पतिले ढाकिएका स्थानमा बस्न रुचाउने लजालु स्वभावको चरा हो । झाडीभित्र लुकेर बस्ने भएकाले यसलाई सहजै देख्न कठिन हुन्छ । त्यसैले नयाँ क्षेत्रमा यसको उपस्थिति अभिलेख हुनुलाई पक्षी अध्ययन तथा जैविक विविधताको पहिचानका दृष्टिले महत्वपूर्ण मानिन्छ ।
प्राकृतिक सुन्दरता र जैविक विविधताका हिसाबले महत्वपूर्ण ठाडादहमा यो चरा भेटिनुले क्षेत्रको पर्यावरणीय महत्वसमेत उजागर गरेको छ । यहाँका वन तथा प्राकृतिक बासस्थानमा अन्य दुर्लभ प्रजातिका चरा पनि हुन सक्ने सम्भावना देखिएको छ ।
सूचना अधिकारी खड्काले काँडे भ्याकुरजस्ता दुर्लभ चराको संरक्षणका लागि प्राकृतिक बासस्थान जोगाउनुपर्ने बताउनुभयो । वन विनाश, झाडी तथा प्राकृतिक वनस्पतिको क्षयीकरण र मानवीय गतिविधिले यस्ता चराको बासस्थानमा असर पार्न सक्ने भएकाले संरक्षणमा विशेष ध्यान दिनुपर्ने उहाँको भनाइ छ ।
ठाडादहमा काँडे भ्याकुरको उपस्थिति अभिलेख हुनुले अर्घाखाँचीको जैविक विविधताको पहिचानसँगै पक्षी अवलोकन, अनुसन्धान र पर्यापर्यटनको सम्भावनासमेत बढाएको छ ।
