कैलालीको अत्तरिया क्षेत्रका किसानहरूले स्थानीय जातको थारु आलु खेतीबाट मनग्य आम्दानी गरिरहेका छन्। धनगढी उपमहानगरपालिका-६, शान्तिटोलका किसानहरू यस खेतीबाट लाभान्वित भएका छन्।

शेरुराम चौधरीले यस वर्ष थारु आलु बिक्री गरेर ३ लाख रुपैयाँ आम्दानी गरे। उनले ८ कठ्ठामा आलु खेती गरेका थिए र ४० क्विन्टल उत्पादन गरे। प्रतिकिलो १५० रुपैयाँमा बिक्री भएको आलु अझै २० क्विन्टल बिक्री गर्न बाँकी रहेको उनले बताए। यो आलु स्वादिलो हुनुका साथै लामो समयसम्म भण्डारण गर्न सकिने उनको भनाइ छ। तरकारी खेतीबाट समेत उनले वार्षिक ६ लाख रुपैयाँसम्म बचत गर्ने गरेको बताए।

त्यसैगरी, पतिराम चौधरीले ७ कठ्ठामा थारु आलु लगाएर २५ क्विन्टल उत्पादन गरे। उनले केही आलु बिक्री गरिसकेका छन् भने बाँकी असारमा बेच्ने योजना बनाएका छन्। आलुसँगै तरकारी खेती गरेर उनले वार्षिक ३ लाख रुपैयाँसम्म बचत गर्ने गरेका छन्।

रवि चौधरीले ४ कठ्ठामा थारु आलु खेती गरेका छन् र ८ क्विन्टल उत्पादन गरेका छन्। मूल्य बढेपछि बेच्ने योजनामा रहेका उनले तरकारी र थारु आलु बिक्रीबाट वार्षिक २ लाख रुपैयाँ आम्दानी गर्ने गरेको बताए। माग बढ्न थालेपछि किसानहरूले थारु आलु खेतीलाई पुनः प्राथमिकता दिन थालेका छन्।