दोस्रो राष्ट्रिय आर्थिक गणनाको तयारी तीव्र: देशभरका ८४ केन्द्रमा गणकलाई तालिम सुरु

काठमाडौँ, २६ चैत । राष्ट्रिय तथ्याङ्क कार्यालयले सञ्चालन गर्न लागेको ‘दोस्रो राष्ट्रिय आर्थिक गणना, २०८२’ का लागि छनोट भएका गणकहरूका लागि आजदेखि देशभर एकैसाथ पाँचदिने तालिम कार्यक्रम सुरु हुँदैछ । मुलुकको आर्थिक गतिविधिहरूको यथार्थ अवस्था पहिचान गरी राष्ट्रिय अर्थतन्त्रसम्बन्धी तथ्याङ्क अद्यावधिक गर्ने उद्देश्यले यो गणना गर्न लागिएको हो ।

राष्ट्रिय तथ्याङ्क कार्यालयले नेपाल पत्रकार महासङ्घसँगको सहकार्यमा बुधबार राजधानीमा आयोजना गरेको एक कार्यक्रममा यसबारे विस्तृत जानकारी दिइएको हो । कार्यालयका उपप्रमुख तथ्याङ्क अधिकारी एवं प्रवक्ता ढुण्डिराज लामिछानेका अनुसार देशभर स्थापना गरिएका ८४ वटा कार्यालयबाट गणकहरूलाई एकैसाथ प्रशिक्षण दिन थालिएको हो ।

प्रवक्ता लामिछानेका अनुसार गणकहरूको छनोट प्रक्रिया सम्पन्न गरी उनीहरूलाई कार्यक्षेत्रमा खटाउनुपूर्व आवश्यक सीप र विधिको बारेमा तालिम दिन लागिएको हो । “बिहीबारदेखि सुरु हुने यो तालिम पाँच दिनसम्म चल्नेछ,” लामिछानेले भन्नुभयो, “तालिम सम्पन्न भएलगत्तै आगामी २०८३ वैशाख २ गतेदेखि गणकहरू देशभर आर्थिक गणनाका लागि स्थलगत रूपमा खटिनेछन् ।”

यो आर्थिक गणनाले नेपालको अर्थतन्त्रको वास्तविक स्वरूप, संरचना र आर्थिक क्रियाकलापहरूको विस्तृत विवरण सङ्कलन गर्नेछ । यसबाट प्राप्त हुने तथ्याङ्कले सरकारलाई आगामी आर्थिक नीति र योजना निर्माणमा ठोस आधार प्रदान गर्ने विश्वास लिइएको छ ।

यसअघि नेपालमा पहिलो पटक वि.सं. २०७५ सालको वैशाख–जेठ महिनामा राष्ट्रिय आर्थिक गणना सञ्चालन गरिएको थियो । दोस्रो चरणको यो गणनालाई थप प्रविधिमैत्री र विश्वसनीय बनाउन कार्यालयले स्थानीय तहहरूसँग समेत आवश्यक समन्वय गरिसकेको जनाएको छ ।