विपक्षी दलहरूको अवरोधपछि प्रतिनिधिसभा बैठक पनि स्थगित

मैत्री न्युज

१८ जेठ २०८३

१४३ दिन अगाडि

विपक्षी दलहरूको अवरोधपछि प्रतिनिधिसभा बैठक पनि स्थगित

काठमाडौँ, १८ जेठ । नेपाल–भारत सीमा विवादबारे प्रधानमन्त्रीले दिनुभएको विवादित अभिव्यक्तिलाई लिएर विपक्षी दलहरूले अवरोध गरेपछि प्रतिनिधिसभाको बैठक स्थगित भएको छ। विपक्षी दलहरूको निरन्तरको अवरोध र नाराबाजीपछि सभामुख डिपी अर्यालले बैठक १५ मिनेटका लागि स्थगित गर्नुभएको हो।

आज बैठक सुरु हुनासाथ प्रतिपक्षी दलका सांसदहरूले आफ्नो स्थानबाट उठेर विरोध जनाएका थिए। उनीहरूले प्रधानमन्त्रीले आइतबार संसद्‍मा दिनुभएको सीमासम्बन्धी अभिव्यक्ति राष्ट्रिय हित विपरीत रहेको उल्लेख गर्दै त्यसलाई संसद्को अभिलेख (रेकर्ड) बाट तत्काल हटाउनुपर्ने र प्रधानमन्त्रीले संसद्‍मार्फत देशवासीसँग माफी माग्नुपर्ने माग राखेका थिए।

विपक्षी सांसदहरूको नाराबाजी र अवरोधका कारण बैठक अगाडि बढाउने स्थिति नभएपछि सभामुख अर्यालले १५ मिनेटका लागि बैठक स्थगित गर्ने घोषणा गर्नुभएको हो।