विश्वकप भिडन्तअघि मेक्सिकन फ्यानद्वारा इक्वेडरका खेलाडीको निन्द्रा बिथोल्ने प्रयास, महासंघद्वारा औपचारिक उजुरी दर्ता

काठमाडौं । फिफा विश्वकप २०२६ को ‘राउन्ड अफ ३२’ को निर्णायक भिडन्तअघि मेक्सिकोका फुटबल फ्यानहरूले विपक्षी टोली इक्वेडरका खेलाडीहरूको निन्द्रा बिथोल्ने प्रयास गरेका छन्। मेक्सिको सिटीमा हुने खेलको अघिल्लो रात मेक्सिकी समर्थकहरूले इक्वेडर टोली बसेको होटल बाहिर रातभर होहल्ला गरेका हुन्।

मेक्सिको सिटीको बाहिरी क्षेत्रमा रहेको विलासी ‘वेस्टिन होटल’ बाहिर मध्यरातदेखि बिहान सबेरैसम्म सयौं फ्यानहरू भेला भएका थिए। उनीहरूले लाउडस्पिकर, ठूला हर्न र मोटरसाइकलको आवाज निकालेर खेलाडीहरूलाई सुत्न दिएनन्। ल्याटिन अमेरिकी फुटबलमा विपक्षी टोलीको मनोबल गिराउन र उनीहरूको निन्द्रा बिगार्न यस्तो गर्ने पुरानो परम्परा रहे पनि यसपटक यसले उग्र रूप लिएको छ।

इक्वेडर फुटबल महासंघको कडा आपत्ति
यस घटनापछि इक्वेडर फुटबल महासंघ (FEF) ले विश्वकप आयोजक समक्ष औपचारिक उजुरी दर्ता गरेको छ। महासंघले जारी गरेको विज्ञप्तिमा भनिएको छ, “यस्तो व्यवहार विश्वकपले बोक्ने निष्पक्ष खेल (फेयर प्ले), समानता र एकताको सिद्धान्त विपरीत छ। हामी सम्बन्धित निकायलाई हाम्रा खेलाडी, प्रशिक्षक र समर्थकको सुरक्षा सुनिश्चित गर्न र यस्ता घटना रोक्न आवश्यक कदम चाल्न आग्रह गर्दछौं।”

इक्वेडरका लागि ‘ट्राभल दुस्वप्न’
मैदानमा उत्रनुअघि नै इक्वेडरको टोलीले विभिन्न सास्ती खेप्नु परेको छ। मेक्सिको सिटीको २,२०० मिटरको उचाई (Altitude) का कारण हुने स्वास्थ्य समस्या (Altitude Sickness) बाट बच्न इक्वेडरले ‘फ्लाइ-इन, फ्लाइ-आउट’ रणनीति अपनाएको थियो। यस अन्तर्गत खेलको केही समयअघि मात्रै शहरमा प्रवेश गर्ने योजना थियो। तर, कोलम्बस (ओहायो) बाट सुरु भएको उनीहरूको यात्रा ढिलाइका कारण कष्टकर बन्यो।

टोलीका मुख्य प्रशिक्षक सेबास्टियन बेकासेसेका अनुसार विमान ३ घण्टा ढिलो हुँदा ६ घण्टाको यात्रा ९ घण्टा लामो हुन पुगेको थियो। साथै, विमानस्थलबाट होटलसम्म पुग्ने ६५ किलोमिटरको दुरी पार गर्न मेक्सिको सिटीको अत्याधिक ट्राफिक र भारी वर्षाले थप सास्ती दियो।

यति धेरै अवरोधका बाबजुद प्रशिक्षक बेकासेसेले टोलीको मनोबल उच्च रहेको बताएका छन्। उनले भने, “यात्रा निकै लामो र थकाउने रह्यो, तर टोली उत्साहित छ। हामी समूह चरणमा राम्रो नतिजा निकालेको बलियो प्रतिद्वन्द्वीको सामना गर्न तयार छौं।”

मैदान बाहिरको यस्तो ‘मानसिक युद्ध’ पछि अब मैदानमा यी दुई टोलीबीचको प्रतिस्पर्धा निकै रोचक हुने अपेक्षा गरिएको छ।