विदेशी मुद्रा र भारतीय रुपैयाँ ओसारपसार सम्बन्धी राष्ट्र बैंकको नयाँ व्यवस्था : ५ हजार डलरसम्म घोषणा बिना ल्याउन पाइने
काठमाडौँ, साउन ७ । नेपाल राष्ट्र बैंक, विदेशी विनिमय व्यवस्थापन विभागले विदेशी मुद्रा र भारतीय रुपैयाँ ओसारपसार तथा सटही सम्बन्धमा नयाँ सूचना जारी गरेको छ । जसअनुसार नेपाली वा विदेशी नागरिकले ५ हजार अमेरिकी डलर बराबरको रकम भन्सार घोषणा बिना नै नेपाल भित्र्याउन पाउने भएका छन् ।
विदेशी मुद्रा सम्बन्धी व्यवस्था
राष्ट्र बैंकका अनुसार ५ हजार अमेरिकी डलर वा सो बराबरको अन्य विदेशी मुद्रा नेपाल ल्याउँदा भन्सारमा घोषणा गर्नु पर्दैन । ५ हजार अमेरिकी डलर बराबर हुन आउने भारतीय रुपैयाँको हकमा पनि यही नियम लागू हुनेछ । यद्यपि, ५ हजार डलर भन्दा बढी रकम नेपाल ल्याउनु परेमा अनिवार्य रूपमा भन्सार बिन्दुमा घोषणा गरेर मात्र ल्याउनुपर्ने कानुनी व्यवस्था राष्ट्र बैंकले स्पष्ट पारेको छ ।
भारतीय रुपैयाँ (भारु) सम्बन्धी प्रावधान
भारतीय नोटका सम्बन्धमा राष्ट्र बैंकले भारु २०० र भारु ५०० दरका नोटहरू प्रतिव्यक्ति २५ हजार रुपैयाँको सीमासम्म ल्याउन, लैजान र सटही गर्न सकिने व्यवस्था गरेको छ । यो सुविधा सन् २०१६ नोभेम्बर ९ तारिखपछि निष्कासन भई हाल भारतमा चलनचल्तीमा रहेका नोटहरूको हकमा मात्र लागू हुनेछ ।
निषेध गरिएका कार्यहरू
राष्ट्र बैंकले भारतीय रुपैयाँको प्रयोगका सन्दर्भमा केही कडा सर्तहरू समेत राखेको छ । नेपाली नागरिकले भारतबाहेक अन्य तेस्रो मुलुकमा भारतीय रुपैयाँ लैजान वा अन्य मुलुकबाट भारतीय रुपैयाँ नेपाल ल्याउन पाउने छैनन् ।
सन् २०१६ नोभेम्बर ९ भन्दा अगाडि चलनचल्तीमा रहेका पुराना ५०० र १,००० दरका भारतीय नोटहरूको कारोबार र सटहीमा लगाइएको प्रतिबन्ध यथावत् रहेको छ ।
यस व्यवस्थाले विदेशबाट फर्कने नेपाली र नेपाल आउने पर्यटकहरूलाई मुद्रा व्यवस्थापनमा सहजता प्रदान गर्ने अपेक्षा गरिएको छ ।
