विविधतामा एकताले नै राष्ट्रिय अखण्डतालाई बलियो बनाउँछ: राष्ट्रपति पौडेल
काठमाडौँ, २४ साउन । राष्ट्रपति रामचन्द्र पौडेलले नेपालको संविधानले विविधतामा एकतालाई आत्मसात् गर्दै मुलुकका सबै समुदायको हक र हितलाई सुनिश्चित गरेको बताउनुभएको छ।
३२औँ विश्व आदिवासी दिवसका अवसरमा आदिवासी जनजाति आयोगद्वारा आइतबार आयोजित विशेष कार्यक्रममा बोल्दै राष्ट्रपति पौडेलले परापूर्वकालदेखि बसोबास गर्दै आएका आदिवासी जनजातिहरूको विशिष्ट पहिचान र संस्कृति नै नेपालको राष्ट्रिय गौरव भएको उल्लेख गर्नुभयो। उहाँले आदिवासी जनजातिहरू यस धर्तीका भूमिपुत्र भएको भन्दै जल, जमिन र प्राकृतिक स्रोतसँग उनीहरूको अटुट र आध्यात्मिक सम्बन्ध रहेको बताउनुभयो।
राज्यको नीतिनिर्माण र निर्णायक तहमा आदिवासी जनजातिको अर्थपूर्ण सहभागिता सुनिश्चित गर्नु सरकारको दायित्व भएको उल्लेख गर्दै उहाँले हाल स्थानीय तहमा आदिवासी जनजातिको प्रतिनिधित्व उत्साहजनक रूपमा ३६.८ प्रतिशत रहेको जानकारी दिनुभयो। उहाँले आदिवासी समुदायको सशक्तिकरणका लागि बिस्तारै गुणस्तरीय शिक्षामा पहुँच पुर्याएर अगाडि बढ्नुपर्ने आवश्यकता औँल्याउनुभयो।
राष्ट्रपति पौडेलले नेपाल अन्तर्राष्ट्रिय मञ्चमा पनि आदिवासी अधिकारको पक्षमा अग्रपङ्क्तिमा उभिएको स्मरण गराउँदै नेपाल अन्तर्राष्ट्रिय श्रम सङ्गठन (आईएलओ) को महासन्धि नं. १६९ अनुमोदन गर्ने दक्षिण एसियाकै पहिलो राष्ट्र भएको बताउनुभयो। उहाँले आदिवासी जनजातिको अधिकारसम्बन्धी संयुक्त राष्ट्रसङ्घीय घोषणापत्र र जैविक विविधता महासन्धिप्रति नेपालको पूर्ण प्रतिबद्धता रहेको पनि स्पष्ट पार्नुभयो।
सङ्घीय लोकतान्त्रिक गणतन्त्रको स्थापनापछि संविधानमा ‘आदिवासी जनजाति आयोग’ जस्तो संवैधानिक निकायको व्यवस्था गरी आदिवासीहरूको भाषा र संस्कृतिको रक्षाका लागि सशक्तीकरणको काम भइरहेको उहाँको भनाइ थियो। उहाँले तराई–मधेसको विकास र त्यहाँ रहेका आदिवासी समुदायको न्यायबिना समृद्ध नेपाल असम्भव रहेको औँल्याउँदै आपसी सद्भाव र एकताले नै राष्ट्रिय अखण्डतालाई बलियो बनाउने बताउनुभयो।
राष्ट्रपति पौडेलले आदिवासी जनजातिमा रहेको परम्परागत ज्ञान, सीप र प्रविधिलाई व्यावसायिक रूपान्तरण गरी उनीहरूको आर्थिक सशक्तीकरण गर्नु आजको आवश्यकता भएको औँल्याउनुभयो। उहाँले ‘ओपन एयर लिभिङ म्युजियम’ जस्ता नयाँ अवधारणाहरूमार्फत आदिवासी संस्कृतिलाई पर्यटनसँग जोडेर आर्थिक लाभ लिने नीति राज्यले अवलम्बन गर्नुपर्ने सुझावसमेत दिनुभयो।
